ادب سے سر جھکائے آسماں سے کہکشاں آئی- تحدیث نعمت (2015)

ادب سے سر جھکائے آسماں سے کہکشاں آئی
ثنا کرتے ہوئے محفل میں میری بھی زباں آئی

خدا کا شکر ہے سرکارِ دو عالمؐ کی چوکھٹ پر
درودوں کے لئے گجرے مری عمرِرواں آئی

طلب سے بھی زیادہ مل گیا راہِ مدینہ میں
وہاں کچھ مانگنے کی، ہمسفر! نوبت کہاں آئی

ملا ہَے منفرِد اُسلوب آقاؐ کی غلامی کا
مری مدحت نگاری میں بہارِ جاوداں آئی

مرا لشکر تو بازی ہار بیٹھا تھا سرِ مقتل
تری امداد ایسے میں خدائے مہرباں آئی

اسے میں فضلِ ربیّ سے فقط تعبیر کرتا ہوں
ہوا ٹھنڈی مرے گھر میں پسِ وہم و گماں آئی

اجالا ہی اجالا ہو گیا کشتِ دل و جاں میں
ریاضؔ اشکِ رواں کی روشنی جب ناگہاں آئی