پیکرِدلنشیںؐ اے ستارہ جبیںؐ، کوئی تجھ سانہیں، کوئی تجھ سانہیں- تحدیث نعمت (2015)

پیکرِ دلنیشؐ، اے ستارہ جبیںؐ، کوئی تجھ سا نہیں، کوئی تجھ سا نہیں
ملکِ انوار و رحمت کی صبحِ یقیںؐ، کوئی تجھ سا نہیں، کوئی تجھ سا نہیں

کارواں، کارواں، ہر زماں، ہر مکاں، تیرا سایہ سروں پر رہے پرفشاں
رونقِ صحنِ جاں، زینتِ شہرِ دیںؐ، کوئی تجھ سا نہیں، کوئی تجھ سا نہیں

مَیں قصیدوں کی مالا پروتا رہوں، کشتِ ایماں میں جذبات بوتا رہوں
اور روتا رہوں، شہرِ دل کے مکیںؐ، کوئی تجھ سا نہیں، کوئی تجھ سا نہیں

مشعلِ نورِ وحدت کی پہلی کرن، قَصرِ توحید کے بام و در کی پھبن
ثروتِ اہلِ فنؐ، دولتِ سالکیںؐ، کوئی تجھ سا نہیں کوئی تجھ سا نہیں

کاسۂ جاں میں اے رحمتِ دو جہاںؐ، خاکِ در کی عطا ہو مجھے کہکشاں
سرمدی سائباں، لمعۂ عنبریںؐ، کوئی تجھ سا نہیں، کوئی تجھ سا نہیں

اے نگارِ سخن، اے بہارِ ازل، تجھ کو سجدے کرے کیوں نہ میری غزل
ہاتھ روکے اجل، رحمتِ عالمیںؐ، کوئی تجھ سا نہیں، کوئی تجھ سا نہیں

ہَے ترے نام سے عاصیوں کا بھرم، ہے ریاضِؔ حزیں بھی سرِ بزمِ غم
روحِ لوح و قلمؐ، جانِ عرشِ بریںؐ، کوئی تجھ سا نہیں، کوئی تجھ سا نہیں