تشنہ لبوں پہ اسمِ گرامی رقم ہوا- خلد سخن (2009)

تشنہ لبوں پہ اسمِ گرامی رقم ہوا
میرے نبیؐ کا آج بھی مجھ پہ کرم ہوا

صد شکر عمرِ رفتہ کے لیل و نہار میں
آنسو ہر ایک میرا سپردِ قلم ہوا

طائف کی وادیوں سے جو گزرا مرا خیال
مجھ پر دباؤ جَبْرِ مسلسل کا کم ہوا

زنجیرِ عشق اس کے کفن میں تھی ضوفشاں
دیوانہ آج راہیٔ ملکِ عدم ہوا

معراجِ مصطفیٰؐ کی نشانی کے طور پر
روشن فلک پہ آپؐ کا نقشِ قدم ہوا

اُس شامِ منتظر کا مَیں کیا تذکرہ کروں
سجدوں کا اضطراب چراغِ حرم ہوا

مَحشر کے دن بھی نعت حوالہ بنی ریاضؔ
محشر کے دن بھی حرفِ سخن محترم ہوا