دامانِ التجا کی فضا زر فشاں رہی- زم زم عشق (2015)

دامانِ التجا کی فضا زرفشاں رہی
ہر وقت ہمرکاب مرے، کہکشاں رہی

روحِ حروفِ مدحتِ سردارِ کائنات ؐ
پوچھا کسی سے؟ قافلے والو! کہاں رہی؟

سرما کی سرد رات میں اترے ہیں آفتاب
گھر میں مقیم، گرمیٔ نطق و بیاں رہی

برزخ میں بھی درودِ نبی ؐ کی رہی بہار
نعتِ نبی ؐ سے میری لحد گلفشاں رہی

یا رب! کرم محیط ہے تیرا جہان پر
حمد و ثنا تری سرِ حرفِ اذاں رہی

سجدے میں گر پڑے ہیں ستارے مرے تمام
یا رب! ہوائے خلد نبی ؐ مہرباں رہی

امشب جوارِ لوح و قلم میں کِھلے گلاب
آبِ کرم میں ڈوبتی میری زباں رہی

ابرِ کرم شریکِ سفر عمر بھر رہا
رحمت مرے نبی ؐ کی کراں تا کراں رہی

دامن مکینِ گنبدِ خضرا کا چھوڑ کر
اس عَص رِ بیِ چراغ کے لب پر فغاں رہی

خلدِ سخن میں جلتے رہے ہیں نئے چراغ
آق ؐ کے در پہ جھومتی عمرِ رواں رہی

کیا پوچھتے ہو مجھ سے کہانی مری ریاضؔ
ریگِ عرب ہمیشہ پسِ داستاں رہی