نہیں ہے بے سبب میرے قلم کا گلفشاں رہنا- زر معتبر (1995)

نہیں ہے بے سبب میرے قلم کا گُلفشاں رہنا
غلامِ بے نوا کا یوں شریکِ داستاں رہنا

یہ کیسی لذّتِ بے نام ہے ذکرِ محمدؐ میں
اِسی کیفِ مسلسل میں سدا عمرِ رواں رہنا

کھڑی ہے چاندنی کب سے چراغِ آرزُو لے کر
قیامت تک اِسے بھی ہے غبارِ کہکشاں رہنا

کِسی کے نقشِ پا کو ڈھونڈنے کی یہ سند ہو گی
مِرے چہرے پہ محشر میں بھی گردِ کارواں رہنا

انہیں نسبت ہے گلزارِ مدینہ کی ہواؤں سے
مِرے آنگن کے پیڑوں پر بہارِ جاوداں رہنا

بنانا دیدہ تر میں شبیہِ گنبدِ خضرا
سرِ مقتل، پسِ زنداں، درِ گُلشن، جہاں رہنا

اجازت مانگنے جاؤں گا خُود دربارِ اقدس میں
مجھے اچھا نہیں لگتا صبا کا درمیاں رہنا

سلاطینِ زمانہ لاکھ تجھ کو خلعتیں بھیجیں
تو مصروفِ ثنائے خواجۂ کون و مکاں رہنا

بلندی کی طرف پرواز کر جائے مِری مٹی
مجھے تو فطرتاً بھی ہے سرِ ریگِ رواں رہنا

درُودوں کی اِدھر ڈالی، سلاموں کے اُدھر گجرے
دمِ رخصت اِسی حالت میں اے میری زباں رہنا

یہاں بھی اُنکیؐ خوشبو ہے وہاں بھی اُنکیؐ خوشبو ہے
کمالِ آرزو ہے گلُستان در گُلستان رہنا

یہی پہلا سبق ہے مکتبِ عشق و محبت کا
حضورِ حُسن جا کر بے زبان و بے نشاں رہنا

ریاضؔ اہلِ چمن کی آنکھ سے شاید گریں آنسو
ابھی کچھ دیر شاخِ حرف پر شبنم فشاں رہنا