قلم روشن، ورق روشن، سخن روشن، زباں روشن- زر معتبر (1995)

قلم روشن، ورق روشن، سخن روشن، زباں روشن
بفیضِ نعتِ احمدؐ ہیں مرے نطق و بیاں روشن

سند مانگی نہیں اہلِ نظر سے آج تک میں نے
کرے گی مدحتِ سرکارؐ ہی نام و نشاں روشن

قدم بوسی کے صدقے میں ہیں اب تک آسمانوں میں
مہ و خورشید و انجم اور غبارِ کہکشاں روشن

اُفق ہونٹوں کا چومے گا نئے سورج کی کرنوں کو
ہوئے ہیں نُورِ ختم المرسلین سے دوجہاں روشن

یقیں کی سبز رعنائی مرے ماتھے کاجھُومر ہو
کبھی ہو یارسول اﷲ مِرا بھی آسماں روشن

زمِیں تشنہ لبوں پر پھیر لیتی ہے زباں اپنی
گھٹا کی آب جو میں ہے کہاں آبِ رواں روشن

بریدہ شاخ پر لکھتی ہے شب نوحے اُداسی کے
فصیلِ شہرِ گل پر ہو بہارِ جاوداں روشن

رہے گا کب تلک کرب و بلا میں مبتلا شاعر
رہے گا کب تلک میرے مسیحا، زخمِ جاں روشن

تِریؐ سیرت کی خوشبُو سے مشامِ آرزو مہکے
رہے انوار سے تیرؐے کسی کا آشیاں روشن

توؐ آیا تو ہوئی کافور دُنیا سے شبِ ظلمت
تُوؐ آیا تو ہوئے ارض و سماء، کون و مکاں روشن

تِریؐ اقلیمِ رحمت میں عجب منظر یہ دیکھا ہے
نصیبِ دوستاں تو کیا نصیبِ دشمناں روشن

شبیہہِ گنبدِ خضرا ہی آتی ہے نظر مجھ کو
سرمژگاں میں کر لیتا ہوں جب اشکِ رواں روشن

ریاض اُنؐ کا کرم ہے شاملِ احوالِ ناپرساں
رہا ہے آج بھی میرے مقدّر کا دھواں روشن