کورے کاغذ پہ نئے لفظ کا پیکر جاگے- زر معتبر (1995)

کورے کاغذ پہ نئے لفظ کا پیکر جاگے
چشمِ بیدار میں اشکوں کا سمندر جاگے

کشورِ دل میں کُھلے پرچمِ اسمِ رحمت
میری خوابیدہ تمناؤں کا لشکر جاگے

آسماں چنتا رہے چاند ستارے آکر
رات بھر ساتھ مِرے رات کا محشر جاگے

جن کے قدموں سے دمکتا ہے شبستانِ سُخن
شب کے آنگن میں وہی عکسِ منور جا گے

سَر بسر معجزہ ہے اُنؐ کے نفس کی خوشبو
چاند دو ٹکڑے ہوا ہاتھ میں کنکر جاگے

خاکِ طیبہ پہ محبت کی نمازیں ہوں ادا
بختِ خفتہ تِرے ماتھے کا بھی اختر جاگے

مجھ کو مِل جائے حضوری کا سرورِ ازلی
میری ہر پور میں بھی حُبِّ پیمبرؐ جاگے

ابرِ رحمت کی گھنی چھاؤں میں بیٹھے ہوں حضورؐ
صحنِ جاں میں بھی کِسی روز یہ منظر جاگے؎

جُھوم کے اُٹھے گھٹا ارضِ محمدؐ سے ریاضؔ
شہرِ اقبال کی مٹی کا مقدّر جاگے