اقلیمِ ہست و بُود کے سلطاں مرے حضور ﷺ- زر معتبر (1995)

اقلیم ہَست و بود کے سلطاں مِرے حضورؐ
کون و مکاں کے مرکزی انساں مِرے حضورؐ

دیوارِ حسم و جاں کا توازن اُنہیؐ سے ہے
تسکینِ رُوح و قلبِ پریشاں مِرے حضورؐ

منظر شبِ عذاب کا آنکھوں میں ہے مگر
بُجھتے ہوئے دلوں میں فروزاں مِرے حضورؐ

ہر داستاں اُنہیؐ کے کرم کی ہے داستاں
میری کتابِ زیست کا عنواں مِرے حضورؐ
رحمت کا ابر سارے زمانوں پہ ہے محیط
ہر عہد ہر صدی میں نمایاں مِرے حضورؐ

ایمان میرا اُنؐ کے کفِ پا سے لے شعور
سچ مچ کا جیتا جاگتا قرآں مِرے حضورؐ

مجھ سے گناہ گار پہ بھی اُنؐ کی ہے نظر
بے کس نواز رحمتِ یزداں مِرے حضورؐ

دامن تہی ہے نامہ اعمال بھی سیہ
لیکن مِری نجات کا ساماں مِرے حضورؐ

میں طاقِ آرزو میں سُلگتا ہوا چراغ
برجِ دُعا میں نیرِتاباں مِرے حضورؐ

میں ایک برگِ زرد ہوں دستِ غبار میں
اِک سرمدی بہارِ گلستاں مِرے حضورؐ

ہونا مِرا زمین پر اِک بوجھ ہے ریاضؔ
لیکن جوازِ گردشِ دوراں مِرے حضورؐ