سرکارؐ کبھی اپنے ثنا خواں پہ نظر ہو- غزل کاسہ بکف (2013)

گرتی ہوئی دیوارِ گلستاں پہ نظر ہو
سرکارؐ، مرے حالِ پریشاں پہ نظر ہو

ہر لحظہ ہدف بنتا ہے اعدا کے ستم کا
کشمیر و فلسطیں کے مسلماں پہ نظر ہو

کشکولِ گدائی لئے در در پہ کھڑی ہے
بے مول بکی امتِ ارزاں پہ نظر ہو

آباء کے کفن لائے ہیں نیلام گھروں میں
اربابِ سیاست کے قلمداں پہ نظر ہو

کُل میرا اثاثہ ہے لٹا معبدِ زر میں
کمزور سے اک بے سروساماں پہ نظر ہو

دامن میں کوئی پھول بھی کھلتا نہیں، آقاؐ
جلتے ہوئے صدیوں سے، گریباں پہ نظر ہو

کس قعرِ مذلت میں بنائے گی نشیمن
سرکارؐ! شبِ گردشِ دوراں پہ نظر ہو

اے چشمِ کرم! جنتِ ارضی کے افق پر
بیٹوں کے جمے خونِ رگِ جاں پہ نظر ہو

سمجھوتہ شبِ ظلم سے ممکن نہیں ہوتا
سرکارؐ کے گر عہدِ درخشاں پہ نظر ہو

تم روضۂ اطہر پہ ریاضؔ آپؐ سے کہنا
خیموں میں جلی شامِ غریباں پہ نظر ہو