میلہ سا روشنی کا لگے بعدِ حشر بھی- غزل کاسہ بکف (2013)

حرفِ درود لب پہ سجے بعدِ حَشْر بھی
کلکِ ثنا گلاب لکھے بعدِ حَشْر بھی

طاقِ سخن میں میری غزل احترام سے
آ کر چراغِ نعت رکھے بعدِ حَشْر بھی

دل کے ورق پہ رنگ دھنک کے بکھیر کر
خوشبو کتابِ سبز بنے، بعدِ حَشْر بھی

ہو آفتابِ چرخِ رسالتؐ کا تذکرہ
میلہ سا روشنی کا لگے، بعدِ حَشْر بھی

اُنؐ کے قدومِ پاک کے دھوون سے میری نَسل
موتی کرم کے چنتی رہے، بعدِ حَشْر بھی

برزخ میں بھی ہو طوقِ غلامی کی جستجو
وابستگی کا نور رہے بعدِ حَشْر بھی

خلدِ بریں میں بھی رہے کشتِ ادب مری
قندیل آرزو کی جلے، بعدِ حَشْر بھی

تختی پہ اُنؐ کا اسمِ گرامی لکھا رہے
تازہ رہیں حروف مرے بعد حَشْر بھی

اﷲ ہو صدر، آپؐ ہوں مہمانِ آرزو
آقاؐ، ریاضؔ، نعت پڑھے، بعدِ حَشْر بھی