محمدؐ مصطفی کو حاصل کون و مکاں لکّھوں- غزل کاسہ بکف (2013)

غبارِ راہِ ہجرت کو خنک آبِ رواں لکھّوں
میں اشکوں سے مدینے کے سفر کی داستاں لکھّوں

مرا بچپن مری مدحت نگاری کا تسلسل ہے
میں کیوں عمرِ گذشتہ کو بھی عمرِ رائیگاں لکھّوں

یہی مجھ کو سکھایا ہے مرے گھر کے بزرگوں نے
محمد مصطفی کو حاصلِ کون و مکاں لکھّوں

بوقتِ نعت گوئی فیصلہ کرنا نہیں ممکن
ورق کو کہکشاں لکھّوں، قلم کو آسماں لکھّوں

اُنہیؐ کا نام ہے ارض و سما میں ہر طرف روشن
میں اکثر سوچتا ہوں نعت لکھّوں تو کہاں لکھّوں

مدینے کا پتہ مَیں پوچھتا پھرتا ہوں مَحْشر میں
اُسی شہرِ خنک کو ہر کسی کا سائباں لکھوّں

قلم جو رقص کرتا جا رہا ہے جانبِ طیبہ
اجازت ہو تو اس کو قافلے کا سارباں لکھّوں

قدم بوسی کا حاصل ہے اسے اعزازِ لافانی
مدینے کی میں خاکِ پاک کو عنبر فشاں لکھّوں

لبِ تشنہ پہ جاری ہے ثنائے مرسلِ آخرؐ
قلم کو حوضِ کوثر پر بھی اپنا ہمزباں لکھّوں

مدینے کے مسافر کے مَیں ہر نقشِ کفِ پا کو
نظر میں جھلملاتی سی مصوَّر ارضِ جاں لکھوں
خزاں کے موسمِ بے کیف سے نسبت نہیں کوئی
ہوائے خلدِ طیبہ کو بہارِ جاوداں لکھوں

درِ سرکارؐ پہ لفظوں کی سب بیساکھیاں ٹوٹیں
میں اشکوں کی تپش کو کیوں نہ اپنا ترجماں لکھوں

ورق جس پر شبیہہِ گنبدِ خضرا بناتا ہوں
اُسے کاغذ کی کشتی کا محافظ بادباں لکھوں

حروفِ نعت کی قیمت چکانا غیر ممکن ہے
بہت کم ہے اگر ان کو حروفِ زرفشاں لکھوں

مرے لمحاتِ افسردہ میں دل کو تھام لیتا ہے
ریاضــــؔ، اسمِ گرامی کو میَں اسمِ مہرباں لکھوں