روشنی کی انتہا ہے سیرتِ خیبر البشرؐ- برستی آنکهو خیال رکهنا (2018)

مخزنِ افکارِ روشن مدحتِ خیرالبشرؐ
ہر لغت کی آبرو ہے رحمتِ خیرالبشرؐ

علم، حکمت، عدل، دانائی، قلم، مکتب، عمل
سوچ کی پاکیزگی ہے دولتِ خیرالبشرؐ

آبرو اولادِ آدم کی ہے کردارِ رسولؐ
روشنی کی انتہا ہے سیرتِ خیرالبشرؐ

خوشبوؤں سے بھر گیا ہے دامنِ ارض و سما
وسعتِ افلاک میں ہے نکہتِ خیرالبشرؐ

پوچھئے قرآن سے کیا مصطفیٰؐ کی شان ہے
درج ہے ہر ہر ورق پر عظمتِ خیرالبشرؐ

آپؐ کا ہر ہر عمل ہے کہکشاں اخلاق کی
انس و جاں پر لازمی ہے طاعتِ خیرالبشرؐ

میں تہی دامن کھڑا، ہوں مصر کے بازار میں
ایک دن مجھ کو ملے گی خلعتِ خیرالبشرؐ

آپؐ سے پہچان میری، آپؐ سے میرا بھرم
مجھ کو بھی حاصل ہوئی ہے نسبتِ خیرالبشرؐ

جاں نثاری ختم ہے اُنؐ کے غلاموں پر ریاضؔ
گوہرِ مقصود ہے بس الفتِ خیرالبشرؐ

میرا سرمایہ ریاضِ مضطرب حرفِ ادب
رفعتِ احکامِ ربی ثروتِ خیرالبشرؐ