طلب کے شامیانوں میں زرِ صلِّ علیٰ اترے- برستی آنکهو خیال رکهنا (2018)

مرے آنگن کے پیڑوں پر مدینے کی ہوا اترے
کبھی جلتے ہوئے موسم میں ساون کی گھٹا اترے

ضمیمہ چھاپ دیں اخبار والے روسیاہی پر
رعونت کے گرجتے تخت سے جھوٹی اَنا اترے

جوارِ گنبدِ خضرا کا ہر موسم ہے جنت کا
افق کے دامنِ دلکش میں منظر دلربا اترے

ترے محبوبؐ کے ادنیٰ سے شاعر کی تمنا ہے
قلم کے لب پہ جو اترے وہ مضموں لب کشا اترے

دعائیں مانگتا رہتا ہوں آقاؐ کے وسیلے سے
مرے زخموں کی چادر پر کبھی خاکِ شفا اترے

جہالت ذہنِ انسانی سے رخصت ہو مرے آقاؐ
در و دیوارِ مکتب پر قلمدانِ دعا اترے

تلاشِ نقشِ پائے مصطفیٰؐ میں جھوم کر نکلیں
ہر اک بچے کی تختی پر کتاب ارتقا اترے

مدینے کی فضا میں خوشبوئیں رقصاں ہیں صدیوں سے
صبا کے پھول سے لب پر درودِ مصطفیٰؐ اترے

تپش آمادہ موسم میں ہوائیں چھپ کے بیٹھی ہیں
جلی بستی کی گلیوں میں خنک آب و ہوا اترے

دعا دی ہے مدینے کے مسافر نے دمِ رخصت
طلب کے شامیانوں میں زرِ صلِّ علیٰ اترے

حروفِ آرزو میں خلد کی دلکش بہاریں ہوں
دلوں پر مدحتِ خیرالبشرؐ خیرالوریٰؐ اترے

غلامی کی ہیں زنجیریں اثاثہ میری نسلوں کا
مری لوحِ ادب پر آپؐ کا ہر نقش پا اترے

مدینے کے سفر میں رم جھموں کا حال بتلاؤ
مرے قلبِ پریشاں پر خوشی کی انتہا اترے

غبارِ شہرِ طیبہ کے سوا کچھ بھی نہیں مانگا
مرے مفلوج ہاتھوں پر کرم اترے عطا اترے

ابھی تک وَجد کے عالم میں ہیںسب دھڑکنیں دل کی
تصوُّر میں کبھی یارب! شبِ غارِ حرا اترے

سخن کے شہرِ پُرنم کی ہواؤ اس طرف آؤ
مری اس میز پر میرا بھی سامانِ بقا اترے

ریاضؔ آنسو ندامت کے کہانی سب سنا ڈالیں
شبِ غم کے اندھیروں میں چراغِ التجا اترے