تاج مدینہ: خدائے برگزیدہ کی عطا تاجِ مدینہ سے- تاجِ مدینہ (2017)

خدائے برگزیدہ کی عطا تاجِ مدینہ ہے
اُسی کے رو برو محوِ ثنا تاجِ مدینہ ہے

مدینے کی جبیں پر اَن گنت سجدوں کے سورج ہیں
شعور بندگی کا سلسلہ تاجِ مدینہ ہے

یہاں خلدِ بریں کی خوشبوؤں کا رقص جاری ہے
محیطِ موسمِ ارض و سما تاجِ مدینہ ہے

زمیں پر سانس لینے میں ہے آسانی ہی آسانی
ازل سے تا ابد تازہ ہوا تاجِ مدینہ ہے

مدینے کی ہوا کے ہاتھ میں پھولوں کے گجرے ہیں
چمن زارِ ادب میں دلربا تاجِ مدینہ ہے

کرم کے سلسلوں کی ابتدا مکّے کا موسم ہے
کرم کے سلسلوں کی انتہا تاجِ مدینہ ہے

چراغِ امنِ عالم اِس کی پیشانی کا جھومر ہے
ردائے عافیت، حرفِ دعا تاجِ مدینہ ہے

عروجِ آدمِ خاکی کی اک سچی کہانی ہے
ہوائے عدل و رحمت پرکشا تاجِ مدینہ ہے

قلم کی آرزو ہے مدحتِ آقا ﷺ کی رعنائی
زرِ فقر و غنا، ابرِ سخا تاجِ مدینہ ہے

یہ دستاویز ہے امن و سکوں کی فاختاؤں کی
جو سچ پوچھو تو رحمت کی گھٹا تاجِ مدینہ ہے

ہر اک لمحہ، مصّلے پر، دعا کے پھول رکھتا ہے
غلامانِ نبی ﷺ کا منتہا تاجِ مدینہ ہے

ہر اک زخمی پرندے کا حصارِ عافیت طیبہ
ہر اک کمزور انساں کی انا تاجِ مدینہ ہے

رقم تفصیل سے اس میں نصابِ زندگانی ہے
اسے کھولو، کتابِ ارتقا تاجِ مدینہ ہے

تلاطم خیز موجیں خود اٹھا لاتی ہیں ساحل کو
سفینوں کا ازل سے ناخدا تاجِ مدینہ ہے

مریضِ جان و دل، یہ بھی یقینا جانتا ہوگا
دوا تاجِ مدینہ ہے، شفا تاجِ مدینہ ہے

طلب گارِ مدینہ تھا، طلب گارِ مدینہ ہوں
خدائے آسماں تیری رضا تاجِ مدینہ ہے

اُنہی ﷺ کے دم قدم سے پھول بکھرے ہیں ہواؤں میں
جمال و حسن کا بابِ بقا تاجِ مدینہ ہے

چراغِ مدحتِ خیرالبشر ﷺ ہے تیرے ہاتھوں میں
ریاضِؔ خوشنوا تیری نوا تاجِ مدینہ ہے