از زمیں تا بہ فلک ایک ہی چہرہ دیکھوں- زر معتبر (1995)

از زمیں تا بہ فلک ایک ہی چہرہ دیکھوں
قریے قریے پہ اُترتا ہوا سایہ دیکھوں

میرے ہونٹوں پہ دھنک اسمِ محمدؐ کی کِھلے
جاگتے لمحوں میں اِک خواب سہانا دیکھوں

جب بھی الفاظ بنیں بحرِ عقیدت کے صدف
بختِ خفتہ کو سرِ عرش مُعلّٰے دیکھوں

سیرِ گلشن کی ہوس بادِ صبا ہے کِس کو
نعتِ سرکارؐ میں مہکا ہوا جھونکا دیکھوں

لوحِ جذبات پہ لکھتا رہوں نعتیں تیریؐ
حشر کے دن یہی ہاتھوں میں صحیفہ دیکھوں

آرزو میری رہے سر سے برہنہ آقاؐ
کب تلک حرفِ تمنّا کو سُلگتا دیکھوں

کہکشاں اُتری ہے آنکھوں میں سمٹنے کے لئے
شب کے سناٹے میں ہر سمت اُجالا دیکھوں

آج میں بھی شبِ ہجراں کا اُٹھا کر پرچم
گھر سے نکلا ہوں کہ اب شہرِ مدینہ دیکھوں

اب کِسی شخص کی نیندیں نہ اُڑائے گی ہوا
اسمِ احمدؐ کا فصیلوں پہ میں پہرہ دیکھوں

امن کی صبحوں نے گوندھی ہے اُفق کی چوٹی
ابرِ رحمت کو زمانوں پہ برستا دیکھوں

جب بھی میزانِ مِرے ہاتھ میں آجائے ریاضؔ
عدل کے مہرِ درخشاں کا سراپا دیکھوں