ردائے عفو و کرم عہدِ بے اماں کو ملے- تاجِ مدینہ (2017)

ردائے عفو و کرم عہدِ بے اماں کو ملے
کہ حرفِ صبر و تحمل مرے بیاں کو ملے

قلم کو اسمِ محمد ﷺ کی روشنی ہو عطا
ثنائے مرسلِ آخر ﷺ مری زباں کو ملے

غزل ہوائے مدینہ سے ہم کلام بھی ہو
ثنا گری کا ادب عمرِ رائیگاں کو ملے

حضور ﷺ ، ابرِ کرم کے رہے یہ دامن میں
گدازِ دستِ تحفظ بھی آشیاں کو ملے

ورق ورق پہ ستارے ہجوم کرنے لگیں
کتابِ عشقِ نبی ﷺ شامِ مہرباں کو ملے

شمیمِ لالہ و گل احترام سے گذرے
درِ حضور ﷺ حلیفانِ گلستاں کو ملے
یہ رنگ و نور کا چشمہ نظر جو آتا ہے
نقوشِ پاک کی اُترن ہے کہکشاں کو ملے

حصارِ خوف میں رہتی ہے نسلِ انسانی
سکونِ قلب کی دولت بھی اِس جہاں کو ملے

یہ انحراف کے گرد و غبار میں گم ہے
نبی ﷺ کا نقشِ قدم میرِ کارواں کو ملے

حضور ﷺ ، امن کا مژدہ سرِ غبارِ اَنا
مری زمیں کو ملے، میرے آسماں کو ملے

بھٹک رہا ہے ابھی قافلہ سرِ منزل
چراغِ صحنِ حرم میری داستاں کو ملے

ریاضؔ عرض گذاریں جناب ﷺ کے در پر
نیا کلام مری کلکِ گلفشاں کو ملے