معطر ہے میری زباں اللہ اللہ- تاجِ مدینہ (2017)

معطر ہے میری زباں اﷲ اﷲ
فضائیں بھی ہیں گلفشاں اﷲ اﷲ

اتر آئے آنگن میں شاداب لمحے
در و بام ہیں ضوفشاں اﷲ اﷲ

چلی رقص کرتے ہوئے سوئے طیبہ
مناجات کی کہکشاں اﷲ اﷲ

محمد ﷺ محمد ﷺ محمد ﷺ محمد ﷺ
محمد ﷺ کراں تا کراں اﷲ اﷲ

نہ تھا کب زمانوں پہ رحمت کا سایہ
نہ تھے آپ ﷺ کب مہرباں اﷲ اﷲ

اُنہی ﷺ کے کرم سے سلامت ہے اب تک
جلی شاخ پر آشیاں اﷲ اﷲ

اُنہی ﷺ کی مسلسل عنایت کے صدقے
بلندی پہ ہے گردِ جاں اﷲ اﷲ

تمنا ہے مدحت کی سرشاریوں میں
کٹے میری عمرِ رواں اﷲ اﷲ

رقم ہو گی اُن ﷺ کی غلامی کے دن سے
مری مختصر داستاں اﷲ اﷲ

دمِ مرگ ہو میرے ہونٹوں پہ جاری
ثنائے شہِ مرسلاں ﷺ اﷲ اﷲ

ریاضؔ اپنے بختِ رسا کے تصدق
گنہ گار مَیں اور کہاں؟ اﷲ اﷲ