گلستاں سے پرے افلاک پر ہی بجلیاں ٹھہریں- تاجِ مدینہ (2017)

گلستاں سے پرے افلاک پر ہی بجلیاں ٹھہریں
افق کے پار مغرب میں بھٹکتی آندھیاں ٹھہریں

مری کلکِ ثنا کو چوم لیتی تھیں محبت سے
سرِ محشر، خنک پانی میں میری انگلیاں ٹھہریں

جوارِ گنبدِ خضرا میں ٹھہریں چاند سے جگنو
مدینے کی فضاؤں میں ہمیشہ تتلیاں ٹھہریں

کبوتر آپ ﷺ کے در پر سلامی دینے آتے ہیں
درودوں کے لئے گجرے ابھی یہ بدلیاں ٹھہریں

نبی جی ﷺ آپ ﷺ کا شاعر اداسی کے بھنور میں ہے
کبھی امید کے ساحل پہ اس کی کشتیاں ٹھہریں

در و دیوار پہلے ہی سے گیلے ہیں گھروندوں کے
الٰہی تیز پانی میں کہاں تک بستیاں ٹھہریں

مرا ہر زخم تازہ ہے، عطا خاکِ شفا کیجئے
مرے آقا ﷺ مرے آنسو پسِ شہرِ فغاں ٹھہریں

کسی دیوارِ طیبہ پر سجا آیا ہوں مَیں آنکھیں
ہزاروں سسکیاں سرکار ﷺ ، میری ترجماں ٹھہریں

خیالِ وادیٗ طائف پہ آنسو ہی نہیں تھمتے
ہوائے تند کے لشکر نصیب دشمناں ٹھہریں

ہر اک مقطعے میں شامل ہے مرا بھی اسمِ ناکارہ
حروفِ نعتِ پیغمبر ﷺ ، حروفِ جاوداں ٹھہریں

یزیدِ وقت سے کوئی بھی سمجھوتہ نہیں ممکن
ریاضِؔ خوشنوا کے حرف سب حرفِ اذاں ٹھہریں