لوحِ جاں پر نہیں رقم حرفِ صداقت کر لوں- نصابِ غلامی (2019)

لوحِ جاں پر مَیں رقم حرفِ صداقت کر لوں
کلکِ مدحت کی سرِ شام ضیافت کر لوں

اپنے اشکوں سے وضو کر کے بصد عجز و ادب
عشق کے سبز مصلّے پہ عبادت کر لوں

مَیں رعایا ہوں شہنشاہِ مدینہ کی، طلب
شہرِ طیبہ میں سکونت کی اجازت کر لوں

اُن ﷺ کے دربار میں اظہارِ طلب سے پہلے
آپ سرکار ﷺ سے تجدیدِ اطاعت کر لوں

جان جاؤں گا مَیں مفہومِ کتابِ دانش
آپ ﷺ کے چہرۂ اقدس کی تلاوت کر لوں

چھوٹ جاؤں گا میں زنجیرِ مصائب سے ابھی
آپ ﷺ کی ذاتِ مکرّم کو عدالت کر لوں

روغنِ گنبدِ خضرا کو سجا کر دل میں
کم بہت کم درِ آقا ﷺ کی مسافت کر لوں

آج بھی نقشِ کفِ پا ہیں فروزاں اُن ﷺ کے
شہرِ سرکار ﷺ کی گلیوں کی زیارت کر لوں

کھول کر آپ ﷺ کے اوصافِ جمیلہ کی کتاب
اپنی ہر بزم کو مَیں بزمِ رسالت کر لوں

مجھ سے ناکارہ کو بھی پاس بلا لیں، آقا ﷺ
سوچتا رہتا ہوں اب اتنی جسارت کر لوں

طوق ہو اُن ﷺ کی غلامی کا گلے میں پہلے
پھر اگر چاہوں تو دنیا کی امامت کر لوں

قافلہ ٹھہرے ابھی شہرِ مدینہ کا، ریاضؔ
قریۂ شب کے سلاطیں سے بغاوت کر لوں