اس سے بڑھ کر اور کیا ہو خوش نصیبی ہمسفر- نصابِ غلامی (2019)

اس سے بڑھ کر اور کیا ہو خوش نصیبی ہمسفر
زندگی سرکار ﷺ کے قدموں میں ہو جائے بسر

مستقل رہتا ہے منظر جالیوں کا سامنے
مستقل رہتی ہے طیبہ میں کسی کی چشمِ تر

روشنی ہے آپ ﷺ کے اسمِ گرامی کی زکوٰۃ
ہر دیا روشن ہوا ہے آپ ﷺ ہی کے نام پر

آپ ﷺ کی نعلین کی خیرات ہو مجھ کو نصیب
یا خدا! آباد ہو میری دعاؤں کا کھنڈر

منتظر ہے یا نبی ﷺ ، میرا مشامِ جان و دل
آپ ﷺ کے دامن سے وابستہ ہے خوشبو کا سفر

جھوم اٹھتی ہیں ہوائیں چوم کر دہلیز کو
رقص کرتے ہیں مدینے میں چراغِ رہگذر

التجا ہے کاتبِ تقدیر سے یا مصطفیٰ ﷺ
آپ ﷺ کی توصیف مَیں لکھتا رہوں شام و سحر

آرزو ہے آپ ﷺ کے الطاف کی امشب ضرور
سیدی ﷺ ، یا مرشدی ﷺ میری طرف بھی ہو نظر

اب مدینے ہی میں رہنا ہے قیامت تک مجھے
مَیں گرا آیا ہوں جنگل کی فضا میں بال و پر

یہ اگر نعتِ نبی ﷺ لکھنے کے کام آتا نہیں
تو قلم کس کام کا، کس کام کا میرا ہنر

منتظر رہتے ہیں گل خلدِ مدینہ میں ریاضؔ
میرے آقا ﷺ ہیں ازل ہی سے بہارِ منتظر