لفظ کے پیراہنوں کو زرفشاں کہتا رہوں- زر معتبر (1995)

لفظ کے پیراہنوں کو زرفشاں کہتا رہُوں
نعت گوئی کو سخن کی کہکشاں کہتا رہُوں

اپنے خالق کو بھی اپنا ہمزباں کہتا رہُوں
رات کے پچھلے پہر کا راز داں کہتا رہُوں

مخبرِ صادق، نویدِ آسماں کہتا رہُوں
روشنی کا آخری روشن نشاں کہتا رہُوں

آپؐ کو میں آبروئے عاصیاں کہتا رہُوں
رحمت و بخشش کا بحرِ بیکراں کہتا رہُوں

آیۂ شفقت، غرورِ مفلساں کہتا رہُوں
مونس و ہمدم، انیسِ سائلاں کہتا رہُوں

ماورائے فہم و ادراک و گماں کہتا رہُوں
تاجدارِ دولتِ کون و مکاں کہتا رہُوں

سرورِ کونین، شاہِ دو جہاں کہتا رہُوں
میں بھی اُنؐ کو نازشِ پیغمبراں کہتا رہُوں

منزلِ صدق و یقیں کا پاسباں کہتا رہُوں
مصحفِ دل پر نقوشِ جاوداں کہتا رہُوں

آرزو و حسرتِ دیدہ وراں کہتا رہُوں
آپؐ کو بیداریٔ حرف و بیاں کہتا رہُوں

ہر زمانے کا امیرِ کارواں کہتا رہُوں
لمحۂ موجود کا بھی ترجماں کہتا رہُوں

ہادیٔ برحق، امامِ مرسلاں کہتا رہُوں
مسندِ انوار پر جلوہ فشاں کہتا رہُوں

آدمیّت جن کا سایہ ڈھونڈتی ہے آج بھی
اُنؐ کو اپنی کشتیوں کا بادباں کہتا رہُوں

جس کی رحمت کل جہانوں کے لیے مختص ہوئی
اُس نبیؐ کو حامی بیچارگاں کہتا رہُوں

گنبدِ خضرا کو آنکھوں میں چُھپا کر رات دِن
جل رہی ہیں پیرہن کی دھجیاں کہتا رہُوں

آہی جائے گا کِسی دن میرے نالوں کا جواب
میں یونہی دیوانگی میں این وآں کہتا رہُوں

تذکرہ اُنؐ کا فرشتوں کے پروں کی چھاؤں میں
آستاں در آستاں در آستاں کہتا رہُوں

اب تو اتنی سی تمنّا ہے کہ میں شام و سحر
رُوبرو اُنؐ کے حدیثِ شہرِ جاں کہتا رہُوں

یا خُدا لکھتا رہوں میں نعتِ ختم المرسلیں
حشر تک میں نور کی یہ داستاں کہتا رہُوں

جَب نہیں تھانعت سے روشن دل و جاں کا چراغ
اُن دِنوں کو اپنی عمرِ رائیگاں کہتا رہُوں

اس بلا کی دُھوپ میں وہ ابر کا ٹکڑا ریاضؔ
کیوں نہ اُنؐ کو خوشبوؤں کا سائباں کہتا رہُوں