مَیں آئنوں کا سمندر تلاش کرتا ہوں- ورد مسلسل (2018)

(مدینہ منورہ میں لکھی گئی)

مَیں آئنوں کا سمندر تلاش کرتا ہوں
حضور ﷺ ، اپنا مقدر تلاش کرتا ہوں

قدم قدم پہ مرا دل دھڑکنے لگتا ہے
مَیں چشمِ شوق کے گوہر تلاش کرتا ہوں

مَیں شہرِ نور کے شفاف راستوں کو، حضور ﷺ
دیارِ روح کے اندر تلاش کرتا ہوں

مَیں صحنِ مسجدِ نبوی میں با ادب ہوکر
گداز و سوز کے پیکر تلاش کرتا ہوں

سلگتی ریت پہ عزمِ بلالؓ کی ٹھنڈک
قدم قدم پہ وہ منظر تلاش کرتا ہوں

مرے حضور ﷺ کے قدموں کو چومنے والے
احد پہاڑ کے پتھر تلاش کرتا ہوں
مَیں اپنے خواب کی تعبیر دیکھنا چاہوں
حضور ﷺ ، چھوٹا سا اک گھر تلاش کرتا ہوں

جوارِ گنبدِ خضرا کے میں قریب ریاضؔ
نقوشِ پائے پیمبر ﷺ تلاش کرتا ہوں