تابشِ شہرِ درود- زر معتبر (1995)

وادیٔ جاں کی دھنک، تُو موجۂ ابرِ کرم
رفعتوں کے بُرج میں ہَے تیراؐ ہر نقشِ قدم
ثروتِ جمہور ہو، جانِ اَبد، رُوحِ ازَل
ڈھونڈتی ہے تیرؐے دل آویز جلووں کو غزل
رحمتِ عالم محمدؐ سرورِ دینِ مبیں
تیرؐے ہاتھوں سے کُھلا ہے پرچم نورِ یقیں
خوشبوئے جسم مُطہّر آسماں دَر آسماں
تیرؐے قدموں کی چمک ہے کہکشاں در کہکشاں
تیرؐی زلفوں سے ہوا لبریز کشکولِ سحر
تیرؐا رستہ دیکھتی رہتی ہَے پازیبِ نظر
منصبِ اسرا پہ فائز تیرا ہر عکسِ جمیل
تُوؐ خُدا کے آخری پیغام کی پہلی دلیل
تیرؐے آنے سے کُھلے افکار کے بندِ قبا
تیرے فیضانِ مسلسل سے چراغوں میں ضیا
انتخاب و شاہکارِ لم یزل تیرؐا وجود
گرمئی ملکِ سخن ہو تابشِ شہرِ درُود
تیرؐے ہونٹوں کے صحیفوں میں رقم بابِ نجات
سنگِ میلِ ارتقاء ہو، سطوتِ ارضِ حیات
انتسابِ کائناتِ رنگ و بوُ تیراؐ لقب
حشر تک تیرؐی صدا کی حرفِ تازہ کو طلب
تیرؐے نقشِ پا کی خوشبو پرتوِ منزل ہُوئی
دوسری اب ہر قیادت حشر تک باطل ہوئی
حکمت و دانش، شعور و آگہی کے آفتاب
زخم خوردہ فکرِ انسانی میں تازہ انقلاب
علم کے سُورج ترؐے در پر جبیں سائی کریں
راہ کی مٹی سے دامانِ طلب آکر بھریں
تیرؐا دامن چھوڑ کر جائیں کہاں اے بادشاہ
ایک ہی تو ہَے یہ انساں کیلئے جائے پناہ
عافیت کے گوشۂ رحمت میں پھُولوں کے سحاب
شہرِ ناپرساں میں بھی اُترے محبت کی کتاب
میرے بے چہرہ تمدن کی بھی اب پہچان ہو
رحمتوں کے آخری منشور کا اعلان ہو