چشمِ تر میں اشکِ غم کا رتجگا بھی دیکھنا- زر معتبر (1995)

چشمِ تر میں اشکِ غم کا رتجگا بھی دیکھنا
سرمدی لمحات کا یہ سلسلہ بھی دیکھنا

پھر تخیّل جانبِ شہرِ محبت ہے رواں
رقص میں شاداں و فرحاں ہے صبا بھی دیکھنا

دور طیبہ سے میں زندہ ہوں حضوری کے لیے
اِک غلامِ بے نوا کا حوصلہ بھی دیکھنا

دیکھنا کیا کچھ گزر جاتا ہے ہجرِ یار میں
شہرِ جاں میں پرچمِ حرفِ دُعا بھی دیکھنا

کتنے آنسو ہیں ندامت کے مِرے کشکول میں
دل کی آنکھوں سے کبھی اے پارسا بھی دیکھنا

خاکِ جسم و جاں کی ویرانی پہ طعنہ زن نہ ہو
شہرِ روح و دل میں بطحا کی گھٹا بھی دیکھنا

میں تریؐ نسبت کا بھی اعلان کر پاتا نہیں
کتنا مشکل ہے شہا، یہ مرحلہ بھی دیکھنا

آدمی تھک ہار کر اُنؐ کو پکارے گا ریاضؔ
اُنؐ کے دامانِ کرم کی انتہا بھی دیکھنا