اے وطن- ارض دعا

جب تلک چاندنی ہے سرِ آسماں
جب تلک ندیوں میں ہے آبِ رواں
جب تلک ہے دھنک شعر میں پرفشاں
تیرا شاعر ترے گیت لکھتا رہے
اے وطن، اے وطن، اے وطن اے وطن

جب تلک ضوفشاں ہے جبینِ شفق
جب تلک سر خرو ہے صدا کا افق
جب تلک جسم میں ہے لہو کی رمق
تیرا شاعر ترے گیت لکھتا رہے
اے وطن، اے وطن، اے وطن اے وطن

جب تلک پالکی میں ہے شب کی دلہن
جب تلک جھیل میں ہے ہوا کا بدن
جب تلک میرے سر پر ہے نیلا گگن
تیرا شاعر ترے گیت لکھتا رہے
اے وطن، اے وطن، اے وطن اے وطن