خوش آمدید- ارض دعا

(اسلامی سربراہی کانفرنس لاہور 22 فروری 1974ء)

خوش آمدید شہرِ محبت میں دوستو
خوش آمدید بزمِ اخوت میں دوستو

ہر ذرہ ارضِ پاک کا کہتا ہے مرحبا
ہے فرشِ راہ، دیدۂ و دل، ساعتِ وفا
خوش آمدید سیدِ ہجویرؒ نے کہا
گونجی فضائے شہر میں اقبال کی ندا
تم آبروئے دیں ہو حقیقت میں دوستو!

خوش آمدید شہرِ محبت میں دوستو
خوش آمدید بزمِ اخوت میں دوستو

تم اتحادِ ملتِ بیضا کے ترجماں
اپنی خودی کے بن گئے ہو آپ پاسباں
تم انقلابِ فکرو نظر کی ہو داستاں
لاریب تم ہو عظمتِ اسلاف کے نشاں
چشمِ فلک ہے، دیکھتا حیرت میں دوستو!

خوش آمدید شہرِ محبت میں دوستو
خوش آمدید بزمِ اخوت میں دوستو
اوجِ کمال پر ہے مقدر کی روشنی
اتری ہے ذوق و شوقِ مسلسل کی چاندنی
تاریخ اپنے آپ کو ہے ڈھونڈنے لگی
مرکز پہ لوٹ آئی ہے اب امتِ نبیؐ
تم آگئےہو دامنِ رحمت میں دوستو

خوش آمدید شہرِ محبت میں دوستو
خوش آمدید بزمِ اخوت میں دوستو