نذرِ وطن- ارض دعا

پھول جتنے بھی ہونٹوں پہ میرے کھلیں
رنگ جتنے بھی فن کی دھنک کے ملیں
تار جتنے بھی سازِ غزل کے ہِلیں

اے وطن میں تری نذر کرتا چلوں
تیرے دامن کو خوشبو سے بھرتا چلوں

میری آنکھوں میں ہے جس قدر روشنی
میری سانسوں میں ہے جس قدر تازگی
میرے نغموں میں ہے جس قدر نغمگی

اے وطن میں تری نذر کرتا چلوں
تیرے دامن کو خوشبو سے بھرتا چلوں

آج جتنی بھی نکھری ہوئی ہے فضا
آج جتنی بھی مہکی ہوئی ہے ہوا
یہ قلم میرا جتنی بھی لکھے دعا

اے وطن میں تری نذر کرتا چلوں
تیرے دامن کو خوشبو سے بھرتا چلوں

پانیوں میں ہیں جتنی بھی گہرائیاں
بال و پر میں ہیں جتنی بھی پہنائیاں
بج رہی ہیں یہ جتنی بھی شہنائیاں

اے وطن میں تری نذر کرتا چلوں
تیرے دامن کو خوشبو سے بھرتا چلوں

صحنِ گلشن میں جتنی بھی ہیں تتلیاں
جگنوؤں کی یہ جتنی بھی ہیں ٹولیاں
جس قدر بھی چمن میں ہیں رعنائیاں

اے وطن میں تری نذر کرتا چلوں
تیرے دامن کو خوشبو سے بھرتا چلوں

دور جھرنوں کا بجتا ہوا جلترنگ
سر اٹھاتی ہوئی کونپلوں کی امنگ
آسمان پر بکھرتے ہوئے سات رنگ

اے وطن میں تری نذر کرتا چلوں
تیرے دامن کو خوشبو سے بھرتا چلوں

میرے سینے میں جتنی بھی ہیں دھڑکنیں
میری قسمت میں جتنی بھی ہیں ساعتیں
میرے قدموں میں جتنی بھی ہیں منزلیں
اے وطن میں تری نذر کرتا چلوں
تیرے دامن کو خوشبو سے بھرتا چلوں

سبز و شاداب لمحوں کی جادوگری
میرے دل میں اترتی ہوئی شاعری
دامنِ گل میں جتنی بھی ہے دلکشی

اے وطن میں تری نذر کرتا چلوں
تیرے دامن کو خوشبو سے بھرتا چلوں

یہ افق پر حسیں بادلوں کے علَم
جھومتی ندیوں کے کئی زیرو بم
میرے الفاظ اورمیرے لوح و قلم

اے وطن میں تری نذر کرتا چلوں
تیرے دامن کو خوشبو سے بھرتا چلوں

خواب جتنے بھی دیکھے گئے ہیں انہیں
حرف جتنے بھی لکھے گئے ہیں انہیں
لفظ جتنے بھی سوچے گئے ہیں انہیں

اے وطن میں تری نذر کرتا چلوں
تیرے دامن کو خوشبو سے بھرتا چلوں
چاند کی پالکی میں ہواکی دلہن
جھیل میں جھلملاتی ہوئی ہر کرن
سرمئی آسماں ، شبنمی پیرہن

اے وطن میں تری نذر کرتا چلوں
تیرے دامن کو خوشبو سے بھرتا چلوں

جس قدر پھول میں دلکشی ہے اُسے
جس قدر حسن میں دلبری ہے اُسے
جس قدر چاند میں چاندنی ہے اُسے

اے وطن میں تری نذر کرتا چلوں
تیرے دامن کو خوشبو سے بھرتا چلوں