نعت کیا ہے؟- رزق ثنا (1999)

نعت کیا ہے، سرمدی جذبات کی ترسیل ہے
نعت کیا ہے، لا الہ کے نور کی ترتیل ہے
نعت کیا ہے، قصرِ حسن و عشق کی تکمیل ہے
نعت کیا ہے، حکمِ ربی کی فقط تعمیل ہے

رحمت و بخشش کی ارزانی ہے نعتِ مصطفیؐ
دیدہ و دل کی ثنا خوانی ہے نعتِ مصطفیؐ

نعت کیا ہے، عشق کے ساگر میں غرقابی کا نام
نعت کیا ہے، میرے ہر جذبے کی سیرابی کا نام
نعت کیا ہے، ہجر میں سانسوں کی بے تابی کا نام
نعت کیا ہے، گنبدِ خضرا کی شادابی کا نام

نعت ہے بے آب صحرائوں میں پانی کی سبیل
نعت ہے اسمِ محمدؐ ہی کا اک عکسِ جمیل

نعت کیا ہے، وصفِ ختم المرسلیںؐ کا تذکرہ
نعت کیا ہے، عظمتِ نورِ مبیںؐ کا تذکرہ
نعت کیا ہے، نکہتوں کی سر زمیں کا تذکرہ
نعت کیا ہے، سب حسینوں سے حسیں کا تذکرہ

دل کے بنجر کھیت میں کرنیں اگادیتی ہے نعت
نقش باطل کی جبینوں سے مٹادیتی ہے نعت

نعت کیا ہے، قریۂ نخوت کی ویرانی کا نام
نعت کیا ہے، ملتِ بیضا کی سلطانی کا نام
نعت کیا ہے، دست بستہ اُنؐ کی دربانی کا نام
نعت کیا ہے، روضۂ اقدس پہ حیرانی کا نام

نعت ابوابِ محبت کا جلی عنوان ہے
ہم غلامانِ پیمبرؐ کی یہی پہچان ہے

نعت کیا ہے، لب بہ لب طیبہ کے میخانے کا نام
نعت کیا ہے، آنسوئوں کے رقص میں آنے کا نام
نعت کیا ہے، لوحِ جاں پر پھول بکھرانے کا نام
نعت کیا ہے، اُنؐ کی چوکھٹ پر مچل جانے کا نام

نعت کہنے کے لیے دل پاک ہونا چاہئے
غرق الفت دیدۂ نمناک ہونا چاہئے
نعت کیا ہے، وادیٔ شعر و سخن کا افتخار
نعت کا کیا ہے، خوشبوئوں کا صحنِ گلشن میں نکھار
نعت کیا ہے، رات کے پچھلے پہر کا انکسار
نعت کیا ہے، اک عطائے رحمتِ پروردگار

دل کی ہر دھڑکن کہے یا مصطفیؐ تو نعت ہو
حکم دے میرے قلم کو جب خدا تو نعت ہو

نعت کیا ہے، مدحتِ خیرالبشرؐ، خیرالوریٰؐ
نعت کیا ہے، دونوں عالم میں محمدؐ کی ثنا
نعت کیا ہے، شہرِ جاں میں گرمیٔ صلِ علیٰ
نعت کیا ہے، دل کے آئینے میں عکسِ مصطفیؐ

کیا کہوں رعنائیوں کا کون سا انداز
نغمۂ عشقِ رسولِ پاکؐ کا آغاز ہے

نعت کیا ہے، ہر صدی کے سر پہ دستارِ کرم
نعت کیا ہے، رونقِ دامانِ انوارِ حرم
نعت کیا ہے، آب و تابِ مصحفِ لوح و قلم
نعت کیا ہے، خطۂ افکار کا جاہ و حشم

شہرِ طیبہ کی گذر گاہوں میں جینا نعت ہے
جامِ حُبِّ سرورِ کونینؐ پینا نعت ہے