نطقِ مدحت- کلیات نعت

نطقِ جبریل ؑ نہیں، نطقِ پیمبرؐ بھی نہیں
نطقِ مدحت کہ چراغاں ہے فصیلِ لب پر
موجِ پیراہنِ گُل آیۂ قرآں کا لحن
صبحدم بارگہِ رحمت میں
حرفِ توصیف و تشکر کا رکوع
بابِ جبریل پہ تحریر وہ زرّیں لمحے
جن سے تاباں ہوئی تقدیر شبِ ارض و سما
نطقِ توصیف سے انسان ہے معراج نصیب

نطقِ تحدیثِ ہوا
مادرِ اظہاروبیاں
باطنِ ظاہرِ انساں کی زباں
نطق ہی صِدق و صفا،
نطق ہی مکر و فریب
نطق شمشیر و سناں، خوں آشام
چشمۂ صوتِ فسوں
نطق ہی امن و محبت کا جہاں
نطق ہی چہرہ ٔاظہارِ وفا
چشمۂ صوتِ جنوں
جس سے تاباں ہے سماعت کا جہاں
جادۂ تسکین و یقیں
منزلِ جہدِ مسلسل کا امیں
نطق باطن کی زباں
مادرِ صدق و صفا،
ناطقِ مکر و فریب

نفسِ ناطق کہ ہے افکار کاسورج بھی،
مہِ کامل بھی
نطق ہی وسعتِ افلاک بھی ہے
ارضِ ادراک بھی ہے
مادرِ حرف و بیاں
پدرِسلسلۂ کارِ جہاں
نطقِ بے مدحت و توصیف مگر
وسعتِ جاں کی شبِ تیرہ و تار
خواہشِ نفس کی گھمبیر تہیں
نوچ کر رمزِ لطافت کی رگیں
لمحۂ کربِ کثافت بن کر
نورِ اظہارِ نگارِ جاں کو
طبعِ موزوں کے لطیف ارماں کو
حرفِ مدحت کے حریمِ فن کو
چاٹ جاتی ہیں کثافت کی تہیں

کربِ کثافت کا کسوف
نطقِ مدحت کے مہِ تاباں کو
روح کی رمزِ لطافت کے مشامِ جاں کو
سوزِ مدحت میں تپاں انساں کو
بن کے عفریتِ شبِ تار نگل جاتا ہے
شبِ دیجورِ ہوس، بے صبح
نفس محرومِ جلائے مدحت
سلسلۂ کارِ جہاں، حرف و بیاں
ایک بس غوغائے تحدیثِ ہوا

یوں مگرعالمِ بے نطق نہیں
صبحدم پھولوں کی خوشبو مدحت
سبز پتوں میں ہواؤں کا مچلنا مدحت
شاخ در شاخ پرندوں کا چہکنا مدحت
بھنبھناہٹ کی زباں، شہد ٹپکنا مدحت
کھیت کھلیان میں ہے آبِ فراواں مدحت
دور جنگل میں، بیابانوں میں
بحرِ موّاج میں، دریاؤں میں
رمِ حشرات میں، حیوانوں میں
عالمِ مدحتِ بے نطق، یمِ بے ساحل
اور
عالمِ حرف ہے بے جام و سبو
نفسِ ناطق میں کثافت کا کسوف
حسنِ اظہار میں پیوست اندھیروں کی تہیں
نطقِ بے مدحت و توصیف، شبِ تیرہ و تار
خواہشِ نفس کا عفریت
لطافت کے مہکتے گلشن
ظلمتِ شامِ غریباں میں بدل دیتا ہے
نطقِ مدحت کہ ہے اک نفسِ لطیف
نطقِ یوحیٰ کی تجلّی کیا ہے؟

آئیے، مدحت و توصیف کریں
نطقِ انساں کو ستایش کی شناسائی دیں
نطقِ جبریل سنیں، نطقِ پیمبرؐ کو پڑھیں
عالمِ حسنِ لب و گوش کو تسخیر کریں
شام آئی ہے ، فصیلِ لب پر
مدحتِ شاہِ مدینہ کا چراغاں کر لیں
قلب کو نعتِ پیمبر ؐسے درخشاں کر لیں
نطقِ مدحت ہے شفا
نطقِ مدحت ہے رضا،
قلبِ سلیم
نطقِ مدحت ہے سخا،
لطفِ درِ آقائے کریمؐ