گلشنِ توصیف- کلیات نعت

زمیں دہکتے ہوئے چرخ سوز سورج سے
گری ہے ٹوٹ کے
راہِ مدارِ خلقت پر
مثالِ کرۂ آتش
یہ آگ کا طوفاں، فشارِ سوزِ جہنم
صدائے کن پہ حسیں بحر و برمیں ڈھلتی گئی
ظہورِ آدم و حوا کی جنت ارضی
نمودِ حسن کا دریائے بے کراں بن کر
رواں دواں ہے مسلسل، مدارِ خلقت پر
مگر
یہ کرۂ نعمت کہ خود خدا نے کہا
فَبِاَیِّ اٰلَآئِ رَبِّکُمَا تُکَذِّبٰن
یہ حسنِ خاک
خراباتِ آدم و حوا
ترشحاتِ دوامِ صدائے کن فیکوں
عناں بدوش ہے رفتارِ کارروانِ حیات
کہیں پہ زہرہ بدن زمہریر پہنائی
ہے موج موج رواںنیلے پانیوں کی زمیں
سمندروں میں بپا بے کرانیوں کی زمیں
گھنے، وحوش سے آباد، جنگلوں کی زمیں
سبز وسعتوں کی زمیں
صبا، بہار، شفق رنگ نگہتوں کی زمیں
صدائے کن کی اطاعت شعاریوں کی زمیں
امینِ روضۂ اطہر امینِ بیتِ عتیق
امینِ زمزمِ ایماں ، نقوشِ پائے خلیل
مگر
وہ آتشِ سوزاں، وہ آگ کا طوفاں
بھڑک رہا ہے جہنم
وَقُوْدُھَا النَّاسُ وَالْحِجَارَۃ
فشارِ آتشِ نمرود، آتشِ قارون
فشارِ آتشِ زر
قتل و انتشار کی آگ
لوٹ مار کی آگ
یہ قتل سَّآئِلِ وَالْمَحْرُوْم کی آگ
شجرۃ الزقّوم کی آگ
قتل و خونِ اہلِ حقوق
حقوقِ آدم و حوا
حقوقِ ارض و سما
حقوقِ خالق و معبودِکن فکاں کی آگ
بنامِ فسق و فجور
انہی حقوق کے جلتے ہوئے الاؤ میں
درندگی کے سکندر بتا کے لوٹتے ہیں
جو نیک بنتے ہیں نامِ خدا پہ لوٹتے ہیں
زمیں
یہ کرۂ آتش، فشارِ آتشِ زر
فشارِ قتلِ حقوق
قتلِ عصمتِ حوا
قتلِ عز و شرف
فشارِ خونِ بشر
فشارِ آتشِ نمرود، آتشِ قارون
آتشِ شیطاں

صدائے کن کی اطاعت شعاریوں کی زمیں
امینِ روضۂ اطہر
مگر یہ آتشِ سوزاں یہ لوٹ مار کی آگ
فشارِ آتشِ نمرود
کسی نے جھونک دی اولادِ ابراہیم اس میں
مگر یہ طے ہے براہیم کے جنوںکی مہک
پھر آج آتشِ نمرود کے الاؤ کو
ردائے جنتِ تسکین میں بدل دے گی
کِھلے گا پھر اسی آتش میں گلشنِ توصیف
بہارِ حمد و ستایش
خرامِ ناز کے ساتھ
ہر ایک شاخ پہ پھر آج مسکرائے گی

یہ ظلم و جور کے شعلے بنیں گے برگِ ثنا
یہ حِرصِ زر کی تمازت
وفورِ ایماں سے
خنک صبائے ستایش کا روپ دھارے گی
چلے گی نگہتِ توصیفِ مصطفیٰ بن کر
مہک اٹھے گی زمیں جنتِ رضا بن کر
فروغِ خیرِفراواں حقوق کا گلزار
نعتِ سرورِ دیں
وفورِ جوشِ براہیم
گلشنِ توصیف
شبابِ حمد و ستایش
دعائے ابراہیم