ستایش کا موسم ہے روح و بدن میں- کلیات نعت
ترنم کی دنیا کا طوفاں بدن میں
کھلیں عشق و مستی کی کلیاں سخن میں
پسِ حرف جذبوں کی مشعل تھی روشن
تغزل درخشاں گل و نسترن میں
لغت، کورا کاغذ، کرے نطق سجدے
بیاں کی بساطِ ادب اور فن میں
سحابِ نظر چاندنی میں نہایا
فشارِ تجلی بہارِ چمن میں
برسنے لگی عشق و مستی کی رم جھم
پرندوں کے نغموں میں، سر و سمن میں
ہوائے مدینہ نے شاعر کو چھو کر
پیام ستایش بسایا بدن میں
حروفِ ثنا کھل اٹھے شاخِ جاں پر
گرا شہدِ توصیف لب پر، دہن میں
صبا جھومتی تازہ پھولوں سے لپٹی
اڑی تتلیاں، خوشبوئیں سب چمن میں
محمدؐ محمدؐ محمدؐ محمدؐ
ستایش کا موسم ہے روح و بدن میں
عجب جرعہ شوق ہے ان کی مدحت
نمازوں میں سجدوں میں حرفِ سخن میں
o
*