پیاماتِ نبی کے رازداروں کی زباں لکھوں- کلیات نعت

پیاماتِ نبی کے رازداروں کی زباں لکھوں
امینِ خلوتِ سرکارؐ غاروں کی زباں لکھوں

اُحَد کے مَیں لکھوں جذبات زیرِ پائے پیغمبر
چلے جن پر نبیؐ اُن کوہساروں کی زباں لکھوں

جنہیں تھا لمس حاصل آپ کے قدمینِ رحمت کا
تمنا ہے کہ میں ان رھگذاروں کی زباں لکھوں

شبِ معراج تھے جو اُنؐ کے استقبال میں شامل
ادب سے جھلملاتے اُن ستاروں کی زباں لکھوں

رچی حسنِ پیمبرؐ کی مہک جن کے رگ و پے میں
میں اُن رنگیں چمن زاروں بہاروں کی زباں لکھوں
پڑھا تھا کلمۂ طیّب جنہوں نے دستِ اقدس میں
اُن ایماں سے منور سنگ پاروں کی زباں لکھوں

ہوئے تھے جن سے روشن قمقے نورِ فصاحت کے
محبت کے پیمبر اُن اشاروں کی زباں لکھوں

صفا و مروہ کی یہ سعیئِ توصیفِ پیمبرؐ ہے
قدومِ ہاجرہؑ زم زم شعاروں کی زباں لکھوں

مقامِ عرفۂ مدحت میں اوجِ جبلِ رحمت پر
دعائے عفو لکھوں، جرم کاروں کی زباں لکھوں

مطافِ نعت میں جاری رہے طوفِ قلم میرا
پیمبرؐ کے بڑے مدحت نگاروں کی زباں لکھوں

رکھے ہیں سدرۂ اظہار پر حرفِ ثنا ان کے
نہیں ممکن وہاں کے نور پاروں کی زباں لکھوں

عزیزؔ احقر یہ کیا جانے مقامِ مصطفیٰؐ کیا ہے
غلاموں، بے بسوں اور بے سہاروں کی زباں لکھوں