السلام اے کاشفِ سرِّ نہاں- خلد سخن (2009)

1

السّلام اے قائدِ جیشِ وفا
السّلام اے مہبطِ وحیِ خدا
السّلام اے تابشِ غارِ حرا
السّلام اے رونقِ بزمِ دعا
السّلام اے جادہ پیمائے سما
السّلام اے اوجِ برجِ ارتقاء
السّلام اے معنیٔ امن و بقا
السّلام اے سربراہِ انبیاء

امتِ مظلوم آئی ہے حضورؐ
آنسوؤں کے ہار لائی ہے حضورؐ
داستانِ غم سنانے آئی ہے
زخم اپنے سب دکھانے آئی ہے
امن کی خیرات بھی آقاؐ ملے
ہر برہنہ شاخ پر گلشن کھِلے

2

السّلام اے ثروتِ اہلِ یقیں
السّلام اے حاملِ شرعِ مبیں
السّلام اے تاجدارِ مرسلیں
السّلام اے راحتِ قلبِ حزیں
السّلام اے نازشِ عرشِ بریں
السّلام اے زینتِ فرشِ زمیں
السّلام اے سرورِ دنیا و دیں
السّلام اے موجِ نورِ اوّلیں

ابرِ رحمت کو اشارہ کیجئے
اپنی امت کی خبر بھی لیجئے
یا رسول اﷲ، ہم جائیں کدھر
لے کے اپنی چشمِ نم جائیں کدھر
روشنی جھولی میں آقاؐ ڈال دیں
حاضری کا اذن بھی ہر سال دیں

3

السّلام اے آبروئے انس و جاں
السّلام اے اعتمادِ مفلساں!
السّلام اے چارہ سازِ ہر زماں
السّلام اے مونسِ بے خانماں
السّلام اے سطوتِ پیغمبراں
السّلام اے پیشوائے مقبلاں
السّلام اے آرزوئے قدسیاں
السّلام اے کاشفِ سرِّ نہاں

دہر میں امت کو پھر عزت ملے
اس کا ہر چاکِ گریباں بھی سِلے
ہر طرف روشن ہو قندیلِ حرا
عہدِ حاضر میں بھی ہو سب کا بھلا
یا محمد مصطفیٰؐ! لطف و کرم
دست بستہ ہیں مرے لوح و قلم