کشکولِ دعا- خلد سخن (2009)

تا حشر دل ہو مدحتِ سرکارؐ سے غنی
تا حشر میری سانس پکارے نبیؐ نبیؐ

تا حشر گھر میں عشقِ نبیؐ کے جلیں چراغ
تا حشر اُنؐ کے نقشِ قدم کی ہو دلکشی

تا حشر میری نسل کا اعزاز نعت ہو
تا حشر شاخِ لب پہ ثنا کی کھِلے کلی

تا حشر کشتِ دیدہ و دل میں کھِلیں گلاب
تا حشر طاقِ شہرِ دعا میں ہو روشنی

تا حشر دل میں شہرِ خنک کی رہے تڑپ
تا حشر رتجگوں میں کرے رقص چاندنی

تا حشر لوحِ جاں پہ ستارے کریں ہجوم
تا حشر سجدہ ریز ہو خورشیدِ آگہی

تا حشر چشمِ تر میں دھنک موجزن رہے
تا حشر آسماں سے اُترتی رہے نمی

تا حشر ربطِ خاص مقدر بنے مرا
تا حشر ہو نصیب مجھے آپؐ کی گلی

تا حشر آبِ گنبدِ خضرا کی ہو طلب
تا حشر کم نہ ہو مرے ہونٹوں کی تشنگی

تا حشر مجھ کو دولتِ بیدار دے خدا
تا حشر ہو عطا مجھے لفظوں کی نغمگی

تا حشر ہر اُفق پہ کھُلے پرچمِ شعور
تا حشر اُنؐ کے در سے ملے امنِ دائمی

تا حشر ایک لمحہ بھی شب کا بنے نہ رزق
تا حشر ساتھ ساتھ ہوں انوارِ سرمدی

تا حشر سر زمینِ کرم پر رہے خیال
تا حشر شاخِ دیدۂ پُرنم رہے ہری

تا حشر ہو سپردِ قلم گرمیٔ خلوص
تا حشر ہو ورق پر مرے آئنہ گری

تا حشر ہر قدم پہ ہوں مقتل سجے ہوئے
تا حشر جرمِ آگہی کرتا رہے کوئی

تا حشر فکرِ نو کا ہو غلبہ سرِ قلم
تا حشر علم کی ہو جہالت پہ برتری

تا حشر چاند تاروں پہ ڈالیں نئی کمند
تا حشر میرے بچوں کو دے عزمِ آہنی

تا حشر مجھ پہ زندہ حقائق ہوں منکشف
تا حشر کیا رہوں گا مَیں خود سے بھی اجنبی

تا حشر حرفِ حق کی رہے جستجو مجھے
تا حشر ہر یزید سے میری ہو دشمنی

تا حشر میری زندہ سلامت رہے انا
تا حشر شہریاروں سے چاہوں نہ منصفی

تا حشر ہو محیط غبارِ درِ رسولؐ
تا حشر جمگمگائیں یہ اوراقِ زندگی

تا حشر بام و در پہ کروں جان و دل نثار
تا حشر ہو سگانِ مدینہ سے دوستی

تا حشر ہو وسیلۂ سرکارؐ کی تلاش
تا حشر سر پہ چادرِ رحمت ہو آپؐ کی

تا حشر مَیں، ریاضؔ، لکھوں نعتِ مصطفیٰؐ
تا حشر دست بستہ رہے میری شاعری