اشکِ پیہم کی میں برسات لگا لوں تو چلوں- کشکول آرزو (2002)

اشکِ پیہم کی میں برسات لگالوں تو چلوں
اپنے دامن سے ہر اک داغ مٹا لوں تو چلوں

چوم لوں چشمِ تصوُّر میں درِ شاہِ اُمم
سبز گنبد کو نگاہوں میں بسا لوں تو چلوں

توڑ دوں جھوٹی اَنا کے سبھی پیمانوں کو
اپنے ہونے کی علامات مٹا لوں تو چلوں

عجز کے پُھول ہواؤں میں بکھیروں پہلے
مغفرت کا سروسامان اُٹھا لوں تو چلوں

دامنِ عرضِ ہنر چاک ہوا جاتا ہے
خشک ہونٹوں پہ زرِ نعت سجالوں تو چلوں

قَصرِ ایماں پہ مسلط ہے مفادات کا جَبر
شہرِ اوہام کے اصنام گرا لوں تو چلوں

جان دے دوں سرِ دہلیز پیمبرؐ میں بھی
راستہ کوئی حضوری کا بنا لوں تو چلوں

ہر طرف پھیلا ہے افکارِ ندامت کا ہجوم
کلکِ مدحت کو رگِ جاں میں چھپالون تو چلوں

جن پہ میلہ سا چراغون کا لگا رہتا ہے
ہر قدم ان گھنی پلکوں کو بچھا لوں تو چلوں

ساتھ لیتا چلوں اوراقِ تمنا کا نصاب
جوہرِ عشق حوادث سے بچا لوں تو چلوں

سجدۂ شکر بھی واجب ہے مرے ہونٹوں پر
جانبِ شہرِ نبیؐ نامِ خدا لوں تو چلوں

سامنے شہرِ پیمبرؐ کی گذر گہ ہَے ریاضؔ
ذرّے ذرّے کو مَیں آنکھوں سے لگالوں تو چلوں

شوق دامن کو نہیں چھوڑتا لیکن مَیں ریاضؔ
تشنگی حرفِ ستائس کی بجھا لوں تو چلوں