حریمِ عشقِ پیغمبرؐ میں وہ دن بھی خدا لائے- کشکول آرزو (2002)

حریمِ عشقِ پیغمبر میں وہ دن بھی خدا لائے
غلامی کی سند میرے لئے بادِ صبا لائے

چمن زارِ سخن میں نغمۂ صلِّ علیٰ گونجے
زرِ گل ارمغانِ یامحمد مصطفیٰؐ لائے

تلاشِ رزقِ دل لائی ہے بزمِ شعر میں مجھ کو
مری کِشتِ غزل فصلِ ثنائے مجتبیٰؐ لائے

ورق الٹے ہوا تو سامنے ہو روضۂ اطہر
قلم کھولے زباں تو اس پہ بس حرفِ ثنا آئے

جوارِ گنبدِ خضرا میں رہتے ہیں جو خوش قسمت
ہوا نقشِ قدم اُن کے مدینے سے اٹھا لائے

اگرچہ بال و پر بھی جسم پر میرے نہیں باقی
مگر فریاد جب لائے تو سامانِ بقا لائے

طوافِ گنبدِ خضرا بھی لازم ہے مگر آنکھو
یہ سیلِ اشک اندر کی کثافت تو بہا لائے

سرِ، محفل بہت دھندلا رہا ہے آئنہ میرا
کوئی لائے تو پھر عکسِ شبِ غارِ حرا لائے

ہوائے وادیٔ بطحا کے دونوں ہاتھ چوموں گا
غبارِ شہرِ طیبہ کی مرے گھر میں ردا لائے

مری ہر رات گذرے رتجگوں کی ہم نشینی میں
لبوں پر ہجر کا موسم نیا اک ذائقہ لائے

مسیحائی کسی بھی چارہ گر سے اب نہیں ممکن
مرے آقا کے قدموں کی کوئی خاکِ شفا لائے

اگر درکار ہے حسنِ توازن نسلِ آدم کو
تمدن ہر زمانے میں اِنہیؐ کا ضابطہ لائے

انہیؐ کے نقشِ پا پر ہے سفر تاریخ کا جاری
بجز سرکار کے دنیا، جوازِ ارتقا لائے

یہ امت جو برہنے سر کھڑی ہے ریگ زاروں میں
اسے کہنا سرِ مقتل شعورِ کربلا لائے

بہت تاریک ہوتا جا رہا ہے پیش منظر بھی
زمانہ ڈھونڈ کر اُنؐ کے چراغِ نقشِ پا لائے

مجسم اک دعا سرکارؐ تھے طائف کی گلیاں میں
مرا یہ عہد اُنؐ جیسا کہاں سے حوصلہ لائے

پسِ مژگاں زباں مانندِ چوبِ خشک ہے کب سے
کرم کے موتیوں کو بھر کے دامن میں گھٹا لائے

ریاضؔ ادنیٰ سا نوکر آلِ پیغمبرؐ کا ہوں لیکن
مرے مدِّ مقابل زندگی ارض و سما لائے