لوح و قلم شریکِ ثنا خواں ہوئے تو ہیں- کشکول آرزو (2002)

لوح و قلم شریکِ ثنا خواں ہوئے تو ہیں
صد شکر، لفظ صاحبِ ایماں ہوئے تو ہیں

جا کر مرا سلام کہے گی حضورؐ سے
بادِ صبا سے آج بھی پیماں ہوئے تو ہیں

بختِ رسا کو اور بلندی ملے گی کیا
وہ بابِ ذوق و شوق کا عنواں ہوئے تو ہیں

نقش و نگارِ گنبدِ سردارِ کائناتؐ
اوراقِ جان و دل پہ فروزاں ہوئے تو ہیں

آنکھوں کو بند کر کے حضوری کا لیں مزہ
لمحاتِ ہجر تختِ سلیماںؑ ہوئے تو ہیں

میری بیاضِ نعت مرے کام آ گئی
مجرم کی مغفرت کے بھی ساماں ہوئے تو ہیں

نعتِ نبیؐ کے آئنے میں خود کو دیکھ کر
اندر کے آدمی سے پشیماں ہوئے تو ہیں

سر پر سجا کے نقشِ کفِ پائے مصطفیٰؐ
ہم بھی نقیبِ عظمتِ انساں ہوئے تو ہیں

طائف کی سر زمیں پہ گرے خون کے طفیل
تیرے حریف، گردشِ دوراں، ہوئے تو ہیں

سورج پہ تم کو حقِ تصرف ملا تو کیا
آنسو کسی کے سردِ چراغاں ہوئے تو ہیں

تشکیک و اضطراب کے گرد و غبار میں
عقل و شعور و ہوش مسلماں ہوئے تو ہیں

آ کر جہانِ عشقِ رسالت مآبؐ میں
جھونکے شمیمِ خلد کے حیراں ہوئے تو ہیں