میرے آقاؐ کا نام و نسب روشنی- آبروئے ما (2014)

میرے آقاؐ کا نام و نسب روشنی
ہے ازل ہی سے رحمت لقب روشنی

میری محرابِ مدحت کی فردوس میں
رقص کرتی ہے شب بھر عجب روشنی

سب ممالک عجم کے اندھیرے میں ہیں
ہے فقط ایک ریگِ عرب روشنی

نعت لکھنے سے پہلے، چراغِ سخن!
اس قدر میرے گھر میں تھی کب روشنی

شہرِ طیبہ کے دیوار و در ضو فشاں
ہر گلی، ہر محلہ ہے سب روشنی

اُنؐ کی توصیف کے پھول رشکِ قمر
اُنؐ کی توصیف کا ہے ادب روشنی

آپؐ کے نقشِ پا آبشارِ کرم
ہے حضوری کا بھی ہر سبب روشنی

آپؐ کے در پہ اشکوں میں بھیگا ہوا
ہم فقیروں کا دستِ طلب روشنی

ان پہ خوشبو درودوں کی ہے نغمہ زن
میری کلکِ ثنا کے ہیں لب روشنی

دن اجالوں کی پوشاک پہنے ہوئے
بھیگتی نور و نکہت میں شب روشنی

امتی سجدہ ریزی میں مصروف ہیں
تاجدارِ حرم کا ہے رب روشنی

لوٹ جائیں گے دونوں فرشتے اُدھر
قبر میں میری دیکھیں گے جب روشنی

مَیں ریاضؔ اب ستاروں کے جھرمٹ میں ہوں
میرے اسلوبِ فن کی ہے چھَب روشنی