شامِ درود: نعت ہی کی پھول سی تصویر ہے شامِ درود- کائنات محو درود ہے (2017)

نعت ہی کی پھول سی تصویر ہے شامِ درود
بابِ دلآویز کی تحریر ہے شامِ درود

روشنی ہی روشنی ہے آپؐ کا ذکرِ جمیل
نکہتوں کی ریشمی زنجیر ہے شامِ درود

جاں نثاری کی نئی تاریخ کا ہے سر ورق
در حقیقت اسوۂ شبیرؓ ہے شامِ درود

حکمت و دانش کا پرچم اس کے ہاتھوں میں کھُلا
علم و فن کی قیمتی جاگیر ہے شامِ درود

ہے اِسی نسبت سے قائم نسبتِ ربِ عظیم
ساری مخلوقات کی تقدیر ہے شامِ درود

ہر زماں اس شام کے انوار سے ہے مستنیر
ہر جہاں میں سرمدی تنویر ہے شامِ درود
اس کے سر پر ہے کلاہِ الفتِ خیرالبشرؐ
صاحبِ دل، صاحبِ توقیر ہے شامِ درود

ہر طرف سے رحمتِ یزداں کا جاری ہے نزول
رزم گہ میں نعرۂ تکبیر ہے شامِ درود

خوش نصیبی اور کیا ہو گی مری اولاد کی
میرے ہر اک خواب کی تعبیر ہے شامِ درود

نور و نکہت کے سفر کی داستاں حرفِ ثنا
حکمِ ربیّ کی کھُلی تفسیر ہے شامِ درود

ایک اک لمحہ ہے اس کا بخششوں کا پیرہن
مغفرت کی دلنشیں تدبیر ہے شامِ درود

مکتبِ عشقِ پیمبرؐ کے حوالے سے ریاضؔ
شخصیت کی اک نئی تعمیر ہے شامِ درود