جانِ تہذیب و تمدن ہے دبستانِ حضور- کائنات محو درود ہے (2017)

جانِ تہذیب و تمدن ہے دبستانِ حضورؐ
علم، حکمت اور دانائی قلمدانِ حضورؐ

مکتبِ خیرالبشرؐ فکر و نظر کی روشنی
ہے نصابِ زندگانی صرف فرمانِ حضورؐ

خوشبوؤں کے دامنِ صد رنگ میں شبنم گرے
موسمِ دلکش کا مسکن ہے گلستانِ حضورؐ

کیا کسی دیوار کا امت کرے سایہ تلاش
سر پہ ہے سایہ فگن محشر میں دامانِ حضورؐ

لحظہ لحظہ رحمتوں کی کہکشاؤں کا نزول
جگمگاتا ہے ستاروں سے شبستانِ حضورؐ
صرف انسانوں ہی پر اُنؐ کا کرم ہوتا نہیں
ہر کسی مخلوقِ ربی پر ہے احسانِ حضورؐ

ہر قدم پر بارشیں، الہام کی ٹھنڈی پھوار
ا برِ رحمت سے ڈھکا ہے کوہِ فارانِ حضورؐ

میری معمولی سی عمرِ رائیگاں کا ذکر کیا
کیا زمیں، کیا آسماں سب کچھ ہے فیضانِ حضورؐ

جاں نثاری کی نئی تاریخ کے بانی ہیں یہ
پیکرانِ عزم و ہمت ہیں رفیقانِ حضورؐ

ارتقائے نسلِ آدم اُنؐ کے ہیں نقشِ قدم
منبر و محراب و تقویٰ سب ہے سامانِ حضورؐ

رتجگا ہی رتجگا میرا بڑھاپا ہے ریاضؔ
وجد کے عالم میں رہتے ہیں فدایانِ حضورؐ

٭٭٭

اے خدا! زندہ رہے سینوں میں ارمانِ حضورؐ
ہے بنائے دینِ حق، ایقان و ایمانِ حضورؐ

اجنبیت کا مدینے میں تصوُّر ہی نہیں
مصطفیٰؐ کے چاہنے والے ہیں مہمانِ حضورؐ

سائبانِ امن ہے بس کوچۂ خیرالوریٰؐ
عافیت کا مرکزی نقطہ ہے ایوانِ حضورؐ

پھول جھڑتے ہیں زباں سے محفلِ میلاد میں
کیا عظیم المرتبت ہے ہر ثنا خوانِ حضورؐ

کاش پہلی سانس مَیں لیتا درِ سرکارؐ پر
کاش ہوتا عہدِ نبوی میں مَیں دربانِ حضورؐ

میری آنکھوں کی ہے ٹھنڈک آپؐ کا ذکرِ جمیل
میرے سر کا تاج ہیں سارے محبّانِ حضورؐ

یہ ضروری ہے کہ لیں اپنے عمل کا جائزہ
نسبتِ خاکِ درِ آقاؐ ہے میزانِ حضورؐ

اِن کے کشکولِ تمنا میں ہیں سکّے نور کے
میر و سلطاں سے بھی بڑھ کر ہیں گدایانِ حضورؐ

فتنہ و شر کی ہزاروں آندھیاں اٹھّیں مگر
سب کا خالق سب کا مالک ہے نگہبانِ حضور

اجنبیت کا مدینے میں تصوُّر ہی نہیں
مصطفیؐ کے چاہنے والے ہیں مہمانِ حضورؐ

ان کی قسمت میں کسی سورج کی کیا ہو روشنی
ظلمتِ شب کے پجاری ہیں حریفانِ حضورؐ

بندگانِ خالقِ کون و مکاں ہیں ہم ریاضؔ
ہم غلامانِ پیمبرؐ، جاں نثارانِ حضورؐ