حسن و جمالِ گنبدِ خضرا گماں میں ہے- خلد سخن (2009)

حسن و جمالِ گنبدِ خضرا گماں میں ہے
کب سے ہجومِ لالہ و گل آشیاں میں ہے

سورج اُتر رہے ہیں فصیلِ شعور پر
نقشِ قدم کسی کا مری داستاں میں ہے

لوح و قلم کا موسمِ ادراک و آگہی
خلدِ ثنائے سرورِ کون و مکاں میں ہے

محشر کے بعد بھی جو رہے گا محیطِ جاں
میرا قلم کرم کے اُسی سائباں میں ہے

معراجِ آرزو ہے غبارِ رہِ حجاز
اوجِ خیال خاکِ درِ آستاں میں ہے

پہچان میری ریگِ عرب پر ہوئی رقم
میرا نشان ریگِ عرب کے نشاں میں ہے

ہر مجلسِ درود میں کھلتے ہیں لب پہ پھول
عشقِ نبیؐ کا ذائقہ میری زباں میں ہے

اس کے برہنہ سر پہ بھی چادر کرم کی دو
میرے بدن کا عکس زرِ رائیگاں میں ہے

اکیسویں صدی ہے مری نعت کی صدی
بختِ رسا ریاضؔ مرا آسماں میں ہے