چل کر درِ حضور ﷺ پہ دامن بچھائیں ہم- خلد سخن (2009)

چل کر درِ حضورؐ پہ دامن بچھائیں ہم
اور جشنِ وصلِ شہرِ پیمبرؐ منائیں ہم

آ، زائرِ حضورؐ ہمارے بھی ساتھ چل
رودادِ شامِ ہجر تجھے بھی سنائیں ہم

دہلیزِ مصطفیٰؐ کو بصد شوق چوم کر
دیوار و در کو اپنے گلے سے لگائیں ہم

آنکھوں میں بھر کے خاکِ مدینہ کی روشنی
سوئے ہوئے نصیب ازل سے جگائیں ہم

رکھ کر زمینِ سید لولاک پر جبیں
سجدے ہزار شامِ تمنا لٹائیں ہم

ہر دن تلاشِ نقشِ کفِ پا میں کاٹ کر
ہر شام آرزو کے گھروندے بنائیں ہم

آؤ کہ چشمِ تر سے لکھیں عرضِ حالِ دل
یادِ نبیؐ میں رات بھر آنسو بہائیں ہم

دے آبِ ذوق و شوقِ غلامی کا بانکپن
اے آسمان! دیں گے ابد تک دعائیں ہم

طیبہ نگر میں پھول سے بچوں کو دیکھ کر
اپنا وجود راہِ گزر میں بچھائیں ہم

ہونٹوں پہ حسنِ نعت کی بوندیں گریں گی آج
دیوارِ جاں پہ چاند ستارے سجائیں ہم

بے چہرگی کے زخم بدن پر ہیں بے شمار
کیا لے کے آج آئنہ خانے میں جائیں ہم

پیکر نیاز و عجز کا بن جائیں گے، ریاضؔ
طیبہ سے دور دفن کریں گے انائیں ہم