تلاشِ رزقِ قلم میں دلِ حزیں نکلا- کائنات محو درود ہے (2017)

تلاشِ رزقِ قلم میں دلِ حزیں نکلا
ادب کا پھول چمن میں یہیں کہیں نکلا

مدینہ جنتِ ارضی ہے یا رسول اللہ
مدینہ میرے تصُّور سے بھی حسیں نکلا

کلامِ ربِ قدیم و عظیم محشر میں
نصابِ مدحتِ تخلیقِ اوّلیں نکلا

دھنک فضاؤں میں کچھ دیر انتظار کرے
وفورِ نعت ورق پر ابھی نہیں نکلا

حدود ڈھونڈنے نکلو گے پھر بھی رحمت کی
اگر کرم کا ہدف مجھ سا کمتریں نکلا

کسی نے حاشیہ لکھا ہے شوق سے اِمشب
بیاضِ نعت کا ہر شعر دلنشیں نکلا
گلاب رت مرے آنگن میں نعت پڑھتی ہے
دھواں چراغ کا کمرے سے عنبریں نکلا

متاعِ ربطِ مسلسل مرا اثاثہ ہے
ہر ایک اشک زرِ عشق کا امیں نکلا

سمجھ رہے تھے جسے ہم سخن رفیقِ سفر
عدوئے ذاتِ نبیؐ، مارِ آستیں نکلا

درِ نبیؐ پہ گرا اور گر کے ٹوٹ گیا
قلم دیارِ پیمبرؐ کا ہے مکیں نکلا

جسے میں ڈھونڈتا پھرتا تھا رہگذاروں میں
پسِ حروفِ ثنا وہ مرا یقیں نکلا

قدم قدم پہ ستارے بچھے ہوئے ہیں، ریاضؔ
ہر اک خیال مدینے کا مخملیں نکلا

یہ بعدِ مرگ کُھلا میرے ہمنشینوں پر
ریاضؔ شاعرِ سردارِ مرسلیںؐ نکلا