مکتبِ عشقِ نبیؐ میں ہے قلمدانِ حیات- کائنات محو درود ہے (2017)

مکتبِ عشقِ نبیؐ میں ہے قلمدانِ حیات
حشر تک روشن رہے یارب! شبستانِ حیات

میرا تن من دھن ثنائے مرسلِ آخرؐ میں ہے
روشنی کے ہاتھ میں ہے میرا دامانِ حیات

عشقِ ختم المرسلیںؐ کے پھول شاخوں پر کھلے
کتنی خوشبودار ہے شامِ گلستانِ حیات

نعت سرمایہ مرا ہے، نعت ہی زادِ سفر
باندھ رکھّا ہے ازل سے مَیں نے سامانِ حیات

ہر طرف سرکارؐ کے اوصاف کا ہے تذکرہ
ہے منّور آپؐ کے جلوؤں سے ایوانِ حیات

آرزوئے دیدہ و دل آپؐ ہیں آقا حضورؐ
آپؐ ہی جانِ سخن ہیں، آپؐ ہی جانِ حیات
ایک اک لمحہ ہے وقفِ مدحتِ خیرالبشرؐ
سائلِ سرکارؐ ہے پورا دبستانِ حیات

آندھیوں کی زد میں ہے انسان کا خاکی وجود
خاکِ طیبہ سے بنا لاؤں خیابانِ حیات

آپؐ کا شاعر کہاں جائے مدینہ چھوڑ کر
چاک ہے یا سیّدیؐ اِس کا گریبانِ حیات

قصرِ شاہی، منصبِ ارشاد کچھ جچتا نہیں
آپؐ کے در کی غلامی بس ہے شایانِ حیات

تُو ہی دیتا ہے تحفظ کی روا مخلوق کو
کون ہے تیرے سوا، یارب! نگہبانِ حیات

آپؐ کی چوکھٹ پہ لوں مَیں آخری سانسیں، حضورؐ
صرف سینے میں یہی ہے ایک ارمانِ حیات

کھڑکیاں کھُلتی ہیں گھر کی جانبِ طیبہ، ریاضؔ
ہیں بحال اس واسطے میرے بھی اوسانِ حیات