گونجا ہَے اُنؐ کی نعت کا نغمہ، چمن چمن- تحدیث نعمت (2015)

گونجا ہَے اُنؐ کی نعت کا نغمہ، چمن چمن
مدحت کا پھول سرمدی مہکا، چمن چمن

کون و مکاں میں آپؐ ہی ہیں مرسلِ عظیمؐ
ہوتا رہے گا آپؐ کا چرچا، چمن چمن

اِس جبرِ ناروا کی فضائے بسیط میں
اشکِ رواں سے لکھّا ہَے نوحہ، چمن چمن

امت کے آنسوؤں میں ہَے مطلع چُھپا ہوا
خورشیدِ نعت آج بھی نکلا، چمن چمن

خود ساختہ خداؤں کے دعدوں کے باوجود
ہَے خوف انہدام کا پھیلا، چمن چمن

ٹھہرے ہیں شاخ شاخ پہ غنچوں کے قافلے
کُھلتا ہے اُس گلی کا دریچہ، چمن چمن

پھر ضربتِ شدید پڑی ہَے وجود پر
پھر چشمِ التفات ہو، آقاؐ چمن چمن

سب کو عطا ہوں چاند، ستارے، قلم، دوات
لیکن ہو منفرد مرا لہجہ، چمن چمن

اہلِ زمیں کے لاکھ گناہوں کے باوجود
ابرِ کرم ہَے ٹوٹ کے برسا، چمن چمن

یارب! ہوائے امن چلے روز و شب چلے
محبوبِ کائناتؐ کا صدقہ، چمن چمن

تڑپا ہَے ہجرِ شہرِ مدینہ میں آج بھی
زخموں سے چور چور پرندہ، چمن چمن

نعتِ نبیؐ ہَے آج کے اخبار میں چَھپی
خوشبو بنا ہوا ہَے وہ ورقہ، چمن چمن

ہر پھول میں ہَے گنبدِ خضرا کی دلکشی
روضے کی جالیوں کا ہَے نقشہ، چمن چمن

آدم کی نَسل آپؐ کی مقروض ہَے ریاضؔ
سرکارؐ کا ہَے سب پہ ہی سایہ، چمن چمن