بفیضِ نعتِ پیغمبرؐ گلستاں ہے مرے گھر میں- زم زم عشق (2015)

بفیضِ نعتِ پیغمبر ؐ، گلستاں ہَے مرے گھر میں
مرے بچپن سے ہی سروِ چراغاں ہَے مرے گھر میں

صبا انگلی پکڑ کر مجھ کو لے جاتی ہَے طیبہ میں
اگر سوچو تو اک تختِ سلیماں ہَے مرے گھر میں

یہاں تخلیق کے ہر وقت جگنو رقص کرتے ہیں
سخن کی اپسراؤں کا پرستاں ہَے مرے گھر میں

بیاضِ نعت کے اوراق پر کرنوں کی رم جھم ہے
سکونِ قلبِ مضطر کا بھی ساماں ہَے مرے گھر میں

جسے فرصت نہیں سرکار ؐ کی مدحت نگاری سے
خدا کا شکر ہے ایسا قلمداں ہَے مرے گھر میں

غلامی کے حروفِ لب کُشا لکھّے ہیں تختی پر
غلامی کا دبستاں کا دبستاں ہے مرے گھر میں

مرے گھر کی فضا محوِ ثنا رہتی ہے ہر لحظہ
ولائے سرورِ عالم ؐ گل افشاں ہے مرے گھر میں

مکینوں پر کرم اتنا ہوا ہے میرے آق ؐ کا
در و دیوار کی ہر آنکھ حیراں ہے مرے گھر میں

مری راتیں مسلسل کیف کے عالم میں رہتی ہیں
ہجومِ ماہ و انجم کا شبستاں ہے مرے گھر میں

چمن زارِ ثنا میں پھول کھلتے ہیں شریعت کے
ہر اک حرفِ ادب خوشبو بداماں ہے مرے گھر میں

در و دیوار سب مصروف ہیں تحسینِ کعبہ میں
سنو! توصیف کا لعلِ بدخشاں ہے مرے گھر میں

ندامت کے گرے آنسو مری چشمِ ندامت سے
حضور ؐ، اندر کا انساں بھی پشیماں ہے مرے گھر میں

مری مٹھی میں ہَے خاکِ شفائے وادیٔ بطحا
ترے رِستے ہوئے زخموں کا درماں ہَے مرے گھر میں

مسائل کے اندھیروں سے میں کیسے خوف کھاؤں گا
چراغِ مدحتِ آق ؐ فروزاں ہے مرے گھر میں

نبی جی ؐ، کیجئے اپنی رعایا میں اِسے شامل
نکمّا، بے نوا، مجہول انساں ہے مرے گھر میں

ریاضؔ، اپنے قلم کو چوم لوں فرطِ محبت سے
بڑے ہی بخت والا یہ سخنداں ہے مرے گھر میں