ورق ورق پہ مرے دل کی دھڑکنیں ہیں مقیم- دبستان نو (2016)

ورق ورق پہ خدا کی ہے عظمتوں کا جلال
ورق ورق پہ مہکتا ہَے بندگی کا شعور
ورق ورق پہ ہے مکیّ کی رونقوں کا نزول
ورق ورق پہ ہَے کعبے کی رفعتوں کا ورود
ورق ورق پہ ہے صحنِ حرم کی رعنائی
ورق ورق پہ جلال و جمال کی رم جھم
ورق ورق پہ خدا کا ہَے خوف جلوہ گر
ورق ورق پہ پرستش کا نور پھیلا ہَے
ورق ورق پہ طواف و مطاف کی سنگت
ورق ورق پہ حروفِ سپاس بکھرے ہیں
ورق ورق پہ تجلی ہَے سنگِ اسود کی
ورق ورق پہ سبیلیں ہیں آبِ زم زم کی
ورق ورق پہ دعاؤں کے سبز پیراہن
ورق ورق پہ مری التجاؤں کے جھرمٹ
ورق ورق پہ مرے آنسوؤں کی کاہکشاں،
ورق ورق پہ ہَے کوہِ صفا کی سر گوشی
ورق ورق پہ ہَے مرویٰ کی جلوتوں کا بیاں
ورق ورق پہ ہیں غارِ حرا کے نقشِ جمیل
ورق ورق پہ براہیم کے ہیں نقشِ قدم
ورق ورق پہ غلاموں کی گریہ و زاری
ورق ورق پہ ہیں ہجرت کی شب کی تصویریں
ورق ورق پہ ہَے ہجرت کے راستوں کا جمال
ورق ورق پہ مری روح کی ہَے سر شاری
ورق ورق پہ ہَے یثرب کی بچیّوں کی ثنا
ورق ورق پہ مدینے کی ہَے فضا روشن
ورق ورق پہ ستارے رقم کئے مَیں نے
ورق ورق پہ جلائے ہیں آنسوؤں کے چراغ
ورق ورق پہ بکھیرے ہیں پھول مدحت کے
ورق ورق پہ سجودِ قلم کی ہَے لذّت
ورق ورق پہ اجالوں نے گھر بنایا ہے
ورق ورق پہ مرے دل کی دھڑکنیں ہیں مقیم
ورق ورق پہ ہَے رقصاں بہار کا موسم
ورق ورق پہ دھنک زر فشاں ہے صدیوں سے
ورق ورق پہ ہواؤں کا رقَص جاری ہے
ورق ورق پہ مدینے کی آرزو مہکے
ورق ورق پہ کُھلے احترام کے پرچم
ورق ورق پہ کِھلے مدحتِ نبیؐ کے گلاب
ورق ورق پہ ہیں نغماتِ عشق کی لہریں
ورق ورق پہ ہَے جذبات کی فراوانی
ورق ورق پہ ہیں سیرت کی روشنی کے چناب
ورق ورق پہ ہیں میلادِ مصطفیٰ کے چراغ
ورق ورق پہ علومِ جدید کی نکہت
ورق ورق پہ مقامات گل فروشی کے
ورق ورق پہ ہیں عشقِ حبیبؐ کے پنگھٹ
ورق ورق پہ محبت کے شامیانے ہیں
ورق ورق پہ نصابِ قلم کی تحریریں
ورق ورق پہ جزیرے ہیں چشمِ پرنم کے
ورق ورق پہ ہے لفظوں میں خوشبوؤں کا ہجوم
ورق ورق پہ ہیں بے تابیاں شگوفوں کی
ورق ورق پہ ہے عجز و نیاز کی بارش
ورق ورق پہ ہَے حُبِّ رسولؐ کی ٹھنڈک
ورق ورق پہ ہَے نعتِ حضورؐ کی خوشبو
ورق ورق پہ مدینے کی چاند راتیں ہیں
ورق ورق پہ حضوری کا کیف ملتا ہے
ورق ورق پہ ’’زرِ معتبر‘‘ سجایا ہے
ورق ورق پہ ہَے ’’رزقِ ثنا‘‘ بھی سجدے میں
ورق ورق پہ ’’متاعِ قلم‘‘ کی شبنم ہَے
ورق ورق پہ ہے ’’کشکولِ آرزو‘‘ کا سخن
ورق ورق پہ ہَے ’’خلدِ سخن‘‘ کی شادابی
ورق ورق مرا احساس ہَے غلامی کا
ورق ورق پہ شفق کی ہیں سرخیاں، آقاؐ
ورق ورق پہ ہے خوشبو رقم مدینے کی
ورق ورق پہ مواجھے کی خلد کا منظر
ورق ورق پہ ہے کیف و سرور کی برکھا
ورق ورق مرے جذبات کا ہے کاشانہ

رہِ مدینہ میں پلکیں بچھاتے آیا ہوں
حضورؐ، عشق و محبت کے پھول لایا ہوں