موسمِ میلاد کیوں تجھ کو خدا حافظ کہوں- دبستان نو (2016)

موسمِ میلاد کیوں تجھ کو خدا حافظ کہوں
کیسے میں رخصت کروں لمحاتِ پُر انوار کو
تُو مرے دل کے چمن زاروں میں ہے کب سے مقیم
تُو مری سانسوں میں رکھتا ہَے محبت کے چراغ
تُو مرے ہونٹوں پہ لکھتا ہَے ثنائے مصطفیٰؐ
تُو مرے گھر کے دریچوں میں جلاتا ہَے دیے
تیری خوشبو سے مشامِ جاں معطّر ہَے مرا
تیرے دامن کی ہواؤں سے مَیں وابستہ رہوں
موسم میلاد کیوں تجھ کو خدا حافظ کہوں
مَیں جدائی کا تصوُّر کر نہیں سکتا کبھی
موسمِ میلاد تُو ہے روشنی ہی روشنی
ہر طرف تیری بدولت ہیں کرم کی بارشیں
رقص میں ہیں چاند راتیں آج بھی کونَین میں
آمدِ سرکارؐ کی ہَے تُو نویدِ جا نفزا
تُو حجازِ عشقِ پیغمبرؐ کے سر کا تاج ہے
تیرے دامن میں ازل سے روشنی کا ہَے قیام
تیرے دم سے دلکشی ارض و سما پر ہے محیط
انقلابِ نو کی ہَے تُو ہی کتابِ لب کشا
موسمِ میلاد کیوں تجھ کو خدا حافظ کہوں

موسمِ میلاد! کر آنکھیں مری دونوں قبول
میرے لفظوں کے ذخیرے کو ملیں تیرے ہی پھول