میرے قلم کو چومتے لفظو! ادب، ادب- غزل کاسہ بکف (2013)

گردن جھکی رہے مرے بچّو! ادب ادب
ذکرِ نبیؐ ہے شہر کے لوگو! ادب ادب

ہاں، سرورق کتابِ ازل کا حضورؐ ہیں
تاریخِ اِرتقا کے صحیفو! ادب ادب

روزِ ازل سے مَیں ہوں غلامی پہ مفتخِر
ان نسبتوں کا اے مری نسلو! ادب ادب

گجرے لیے کھڑی ہو درود و سلام کے
اُنؐ کی ثناء کی صدیوں پہ صدیو! ادب ادب

لکھنے لگا ہوں نعت رسالت مآبؐ کی
میرے قلم کو چومتے لفظو! ادب ادب

کرنوں کے پھول گھر کی فضا میں کھلیں بہت
دیوارِ جاں پہ رکھے چراغو! ادب ادب

میلادِ مصطفی کے مہینے کے سر پہ تاج
اے منتظر گیارہ مہینو! ادب ادب

جگنو چراغ لے کے ابد تک کھڑے رہیں
شاخوں پہ جھومتی ہوئی کلیو! ادب ادب

اُس قریۂ جمال کے ذرے ہیں آفتاب
اے آسماں کے چاند ستارو! ادب ادب

صبحِ ازل ہے، اس کے در و بام میں مقیم
شہرِ حضورؐ کا، مری صبحو! ادب ادب
شوخی ذرا سی سوئِ ادب ہے سنو! بغور
برسو ضرور، پر، مری آنکھو! ادب ادب

مصروف ہے طوافِ مسلسل میں روشنی
یہ روضۂ نبیؐ ہے نگاہو! ادب ادب

دیکھی نہیں ہیں تم نے مدینے کی رونقیں
مہکی ہوئی چمن کی بہارو! ادب ادب

اُن کی گلی ہے، عام سی کوئی گلی نہیں
چپ چاپ احترام سے گزرو! ادب ادب

اترو فلک سے پڑھتے ہوئے آپؐ پر درود
اُنؐ کے درِ عطا پہ فرشتو! ادب ادب

آنکھیں جھکا کے چلنا بڑے احترم سے
شہرِ نبیؐ کو جاتی ہواؤ! ادب ادب

دیکھو جمالِ گنبدِ خضرا کی تابشیں
خوش بخت میرے قافلے والو! ادب ادب
خوشبو کے لب پہ نعت ہے میری کہی ہوئی
اشکوں میں بھیگتے ہوئے جذبو! ادب ادب

ابرِ کرم حضورؐ کا برسے گا، آج بھی
میرے جلے مکاں کے دریچو! ادب ادب

چھائے نہ دھند بزمِ تصوّر میں بھی کبھی
آوارہ، میرے ذہن کی سوچو! ادب ادب

میرا سلام آپؐ سے کہنا، بصد نیاز
بادِ صبا کے منبسط جھونکو! ادب ادب

لکھّے عروسِ شہرِ غزل، نعتِ مصطفی
قصرِ ادب کے سبز حوالو! ادب ادب

آقاؐ کا نام لکھنے سے پہلے بچشمِ نم
اپنے قلم کو چوم کے لکھو! ادب ادب

تشنہ لبی کا ہو گا مداوا ابھی، ریاضؔ
اسمِ حضورؐ لو، مگر ہونٹو! ادب ادب