رہِ طیبہ میں کب سے ہے درودی کارواں رقصاں- برستی آنکهو خیال رکهنا (2018)

قلم رقصاں، ورق رقصاں، سخن کی کہکشاں رقصاں
ثنا کرتے ہوئے میرے زمین و آسماں رقصاں

یہ کیا اعزاز کم ہے میری نسلوں کا سرِ محشر
مدینے کے سفر میں ہی رہی ہے داستاں رقصاں

مری آنکھیں جوارِ گنبدِ خضرا میں رہتی ہیں
خدا کا شکر ہے آنکھوں کا ہے آبِ رواں رقصاں

میں اپنی خوش نصیبی پر بڑا ہی ناز کرتا ہوں
قلم کی تاجپوشی پر ہوئے نطق و بیاں رقصاں

ثنائے مرسلِ آخرؐ مری پہچان ٹھہری ہے
مرے شہرِ قلم میں ہے زرِ حرفِ اذاں رقصاں

رہوں میں وادیٔ مدحت کے ہر موسم کی بانہوں میں
رہے یارب! فضاؤں میں صدائے زر فشاں رقصاں

ثنا گوئی کی قندیلیں رہیں جلتی سرِ محفل
رہے اسلوبِ مدحت کی فضائے گلفشاں رقصاں

عرب کے ریگ زاروں کے قصائد لکھتا رہتا ہوں
رہے پھولوں کی سنگت میں بہارِ جاوداں رقصاں

اجازت حاضری کی دیں غلاموں کے غلاموں کو
رہِ طیبہ میں کب سے ہیں درودی کارواں رقصاں

مری اتنی سی خواہش کا بھرم رکھ لیجئے آقاؐ
کہ پھر طیبہ کی گلیوں میں ہو عمرِ رائیگاں رقصاں

یہاں تو روشنی ہی روشنی کمروں میں رہتی ہے
چراغِ شام کا ہوتا ہے کب اِن میں دھواں رقصاں

مَیں اُنؐ کے نام کے روشن ستارے چنتا رہتا ہوں
نظر میں کب رہی میری شبِ سود و زیاں رقصاں

یہاں علم و ہنر کی داستانیں ختم ہوتی ہیں
درِ اقدس پہ رہتے ہیں ازل سے کل جہاں رقصاں

مری اوقات کیا ہے شہرِ پیغمبرؐ کی گلیوں میں
کئی برسوں سے مجھ سا بھی ہے دیوانہ کہاں رقصاں

درِ اقدس کے منگتوں کی قطاروں میں کھڑے رہنا
درِ اقدس پہ رہتا ہے ہجومِ تشنگاں رقصاں

ریاضؔ ارض و سما کی وسعتیں ہمراہ ہیں کب سے
مدینے کی طرف ہیں کارواں کے کارواں رقصاں